Բրիտանական The Telegraph պարբերականը գրում է, որ Միացյալ թագավորության արքայազներ Ուիլյամն ու Հարրին մտերիմ հարաբերությունների մեջ են ադրբեջանցի 25-ամյա միլիարդատեր Տալե Հեյդարովի հետ: Նրանք ծանոթացել են 2009-ին և կարճ ժամանակում մտերմացել:
Հեյդարովը սովորում և ապրում է Լոնդոնում և ներդրումներ է անում մարզական տարբեր ակումբներում: Տալե Հեյդարովը Ադրբեջանի արտակարգ իրավիճակների նախարար Քեմալեդդին Հեյդարովի որդին է: Այս առնչությամբ պարբերականը, վկայակոչելով WikiLeaks-ում հայտնված տեղեկությունները, նշում է, որ Ամերիկայի իշխանությունները խիստ մտահոգված են, թե ինչպես է նախարարը դիզել իր հսկայական հարստությունը:
Քեմալեդդին Հեյդարովը համարվում է Ադրբեջանի ամենահարուստ մարդկանցից մեկը և ունի հսկայական բիզնես կայսրություն` ձկնաբուծությունից մինչև շինարարական բիզնես: WikiLeaks-ի տեղեկություններով, երբ Հեյդարովը նախկինում ղեկավարել է մաքսային ծառայությունը, այն համարվել է երկրի ամենակոռումպացված կառույցը և հիմնականում հենց այդ շրջանում է նա կուտակել իր հարստությունը: Քեմալեդդին Հեյդարովը համարվում է ադրբեջանական իշխանական վերնախավի ամենակարևոր անձանցից մեկը և ժողովրդի մեջ նույնիսկ ստացել է «բոլոր կարևոր գործերի նախարար» մականունը:
Սակայն ուշագրավ է, որ նրա որդու` Տալե Հեյդարովի կողմից որևէ իրավախախտման մասին տեղեկություններ չկան: