Ռուսական Օднако հաղորդաշարի հեղինակ և վարող Միխայիլ Լեոնտևը հարցազրույց է տվել vesti.az կայքին, որում անդրադարձել է ղարաբաղյան հակամարտության կարգավորման խնդրին:
Նրա կարծիքով, Հայաստանի, Ադրբեջանի և Ռուսաստանի արտգործնախարարների մոսկովյան հանդիպումից հետո առկա լռությունը վկայում է այն մասին, որ հանդիպումն անարդյունավետ է եղել: Հանդիպումից հետո որևէ կոնկրետ հայտարարության բացակայությունը Լեոնտևն անիմաստ է համարում , քանի որ Հայաստանում և Ադրբեջանում բոլորն էլ հասկանում են, որ այս ձևով հակամարտությունը լուծել հնարավոր չէ և այդ իսկ պատճառով կարգավորումը անընդհատ հետաձգվում է: Փորձագետի կարծիքով, հակամարտության խաղաղ կարգավորում չի կարող լինել:
Իսկ ռազմական լուծման անխուսափելիության մասին հարցին պատասխանել է. «Ի՞նչ է նշանակում՝ ռազմական: Դա աղետ է երկու ժողովուրդների համար էլ: Խնդիրն այն է, որ հակամարտությունը լուծել հնարավոր չէ, միակ լուծումը աղետալին է` ռազմականը: Ղարաբաղում ռազմական կոնֆլիկտը շղթայաբար կոնֆլիկտներ կառաջացնի աշխարհում »:
Լրագրողի կարծիքով, խնդիրը կարող է լուծվել երկու ճանապարհով` կա՛մ վերադառնալ միացյալ պետությանը, կա՛մ սպանել իրար: «Մնացյալը դատարկ խոսակցություններ են: Կա՛մ պետք է սպանել իրար, կա՛մ ապրել քաղաքակիրթ, բազմազգ պետության մեջ»։
Միջնորդների դերը Լեոնտևը անիմաստ է համարում խնդրի լուծման տեսանկյունից: «Ռուսաստանը պետք է լուծի իր հարևանների խնդիրները, սակայն ինքն էլ գտնվում է նույն վիճակում, ինչ հետխորհրդային մյուս երկրները: Ռուսաստանն ինքը չի կարող իր խնդիրները լուծել առանց Վրաստանի, Ադրբեջանի, Ղրղզստանի»։
Լեոնտևը համարում է, որ վերադարձը դեպի ԽՍՀՄ կարող է լուծել ցանկացած խնդիր: