Եվրահանձնաժողովի կողմից Մակրոֆինանսական աջակցության ծրագրի շրջանակներում այս տարվա առաջին 4 ամիսների ընթացքում տրամադրվել են 20.1 մլրդ դրամի վարկային միջոցներ: Շուրջ 3.5 մլրդ դրամ ուղղվել է արտաքին պարտավորությունների մարմանը, որից 2.0 մլրդ դրամ հատկացվել է Համաշխարհային բանկի աջակցությամբ իրականացվող ծրագրերի գծով պարտքի մարմանը, 169.5 մլն դրամ` Գյուղատնտեսության զարգացման միջազգային հիմնադրամի (ԳԶՄՀ), 126.3 մլն դրամ` ՕՊԵԿ-ի միջազգային զարգացման հիմնադրամի նկատմամբ ունեցած պարտքի մարմանը, 436.1 մլն դրամ` ԱՄՆ ապրանքային վարկերի մարմանը, 622.7 մլն դրամ է տրամադրվել Էլեկտրաէներգիայի հաղորդման և բաշխման համակարգի ծրագրի գծով Ճապոնիայի նկատմամբ պարտքի մարմանը, 24.9 մլն դրամ` ԱԷԿ-ի վառելիքի չոր պահպանման համակարգի ծրագրի գծով Ֆրանսիայի նկատմամբ պարտքի մարմանը:
Ֆինանսների նախարարությունից «Առաջին լրատվական»-ին հայտնեցին, որ 13.1 մլրդ դրամ միջպետական վարկ է տրամադրվել ԼՂՀ-ին` 3.1%-ով գերազանցելով նախորդ տարվա համապատասխան ցուցանիշը: Վրաստանի կողմից Հայաստանի նկատմամբ ունեցած վարկային պարտավորությունների գծով առաջին կիսամյակում ծրագրված 144.9 մլն դրամից 79.9 մլն դրամը վճարվել է հունվար-ապրիլ ժամանակահատվածում: Բաժնետոմսերի և կապիտալում այլ մասնակցության ձեռքբերմանն ուղղվել է 792.6 մլն դրամ` կազմելով կիսամյակային ծրագրի 86.7%-ը և 34.5%-ով գերազանցելով նախորդ տարվա համապատասխան ցուցանիշը: Հաշվետու ժամանակահատվածում 775.3 մլն դրամով ավելացել է արտաքին աղբյուրներից ստացված արտաբյուջետային դրամաշնորհային միջոցների մնացորդը:
