Աֆղանստանում ՆԱՏՕ-ի զինված ուժերն այսօր Դաշինքի՝ Հոստ քաղաքից ոչ հեռու գտնվող բազայում հետ են մղել գրոհայինների հարձակումը: Անվտանգությանը նպաստող միջազգային ուժերի ներկայացուցիչների խոսքերով՝ դիմակայության ընթացքում սպանվել է 14 գրոհային, հակառակ կողմից զոհեր չկան։ Այս մասին հաղորդում է itar-tass–ը։
Ինչպես նշում են բրիտանական ԶԼՄ-ները, Հոստ ծայրամասում վերջին շրջանում ակտիվ գործում է հակակառավարական «Հաքքանի ցանց» խմբավորումը:
Հարձակման պատասխանատվությունն իր վրա է վերցրել «Թալիբան» շարժումը:
Ավելի վաղ արված հաղորդագրությունների և տեղի իշխանությունների մի շարք հայտարարությունների համաձայն՝ այսօր առավոտյան «Սալերնո» բազայում ուժեղ պայթյուն է տեղի ունեցել: Բազայի տարածք մտադրվել էին ներթափանցել մի քանի տասնյակ զինված գրոհայիններ, սակայն հարձակումը կանխվել էր: Մի քանի տեղեկություններով, որոնք դեռ պաշտոնապես չեն հաստատվել, պայթյունի ժամանակ զոհվել է մի քանի խաղաղ բնակիչ:
