IRIB News-ի փոխանցմամբ՝ Իրանի նավթարդյունաբերության նախարար Ռոստեմ Ղասեմին մեկնել է Իրաք՝ հանդիպելու այդ երկրի պաշտոնատար անձանց հետ: Ղասեմին մասնավորապես հանդիպելու է իր իրաքցի գործընկեր Աբդել Քարիմ Լաիբի հետ և քննարկելու է նավթի առևտրին առնչվող և փոխադարձ հետաքրքրության կենտրոնում ընկած մի շարք այլ հարցեր:
Ոչ վաղ անցյալում Իրաքը հայտարարել էր, որ պլանավորել է մեծացնել «Ալ-Գարաֆ» և «Ալ-Նասր» նավթահանքերի արդյունահանումը: Ապրիլին Իրաքը նավթի արտահանումն ավելացրել է՝ հասցնելով օրական 2.5 միլիոն բարելի, ինչը 1989 թվականից սկսած ամենաբարձր ցուցանիշն է:
BP-ի տվյալներով՝ Իրաքի ապացուցված նավթային պաշարները 2011 թվականի սկզբի դրությամբ կազմում են 115 միլիարդ բարել: Այդ ցուցանիշով նա համայն աշխարհում զիջում է միայն Սաուդյան Արաբիային ու Իրանին:
