Իրանական IRNA լրատվական գործակալության փոխանցմամբ՝ ԱԷՄԳ-ում Իրանի մշտական ներկայացուցիչ Ալի Ասղար Սոլթանիեն անհիմն է որակել Փարչինի ռազմական օբյեկտում Իրանի ապօրինի գործունեության վերաբերյալ Արևմուտքի մեղադրանքները: Նա այս հայտարարությունն արել է ԱԷՄԳ-ի տեխնիկական հանդիպումներից հետո լրագրողների հետ ունեցած հանդիպման ժամանակ:
Սոլթանիեն ընդգծել է, որ ԱԷՄԳ-ը կարող է Փարչինի օբյեկտ մուտք գործելու թույլտվություն ստանալ, եթե ԱԷՄԳ-ի հետ լայն պայմանավորվածություն ձեռք բերվի Իրանի միջուկային ծրագրի ռազմական ասպեկտի վերաբերյալ հնարավոր հարցերի շուրջ:
Սոլթանիեն հավելել է, որ երրորդ դեմքերը չպետք է միջամտեն Իրանի և ԱԷՄԳ-ի միջև տեխնիկական համագործակցությանը՝ Իրանի միջուկային ծրագրի խնդրի լուծման համար:
Հիշեցնենք, որ արևմտյան մի շարք լրատվամիջոցներ գրել էին, թե Իրանը Փարչինի օբյեկտում հավանաբար անցկացնում է մաքրման աշխատանքներ, ինչի մասին վկայում են նոր արբանյակային լուսանկարները: ԱԷՄԳ-ում կասկածում են, որ Փարչինի օբյեկտում իրանական ակտիվությունը կարող է Թեհրանի կողմից նախկինում արված հետազոտությունների հետքերը թաքցնելու փորձ լինել: