ՄԱԳԱՏԵ-ի նախագահ Յուկիո Ամանոն փետրվարի 1-ին Reuters գործակալության հետ ունեցած զրույցում հայտնել է, որ համակարգչային Stuxnet վիրուսը կարող է վնասել ատոմային կենտրոնների աշխատանքը, թեև Իրանն ու Ռուսաստանը Բուշեհրի ատոմակայանում կարողացել են կանխել վնասի հնարավոր հետևանքները: Ամանոյի համոզմամբ, Stuxnet-ը և, առհասարակ, որևէ կիբերհարձակում կարող է խիստ վնասել ատոմակայանների անվտանգությունը:
Յուկիո Ամանոյի հայտարարությամբ, ՄԱԳԱՏԵ-ն սահմանափակ տեղեկություններ ունի նմանօրինակ համակարգչային վիրուսների մասին, և, նրա գնահատումով, Stuxnet-ը առաջին կիբերհրթիռն է, որը ուղղորդվել է դեպի ատոմային կենտրոնների համակարգիչները:
Ըստ Ամանոյի. «Այս պահին ՄԱԳԱՏԵ-ն չի պահանջում հետաձգել Բուշեհրի ատոմակայանի աշխատանքի մեկնարկը, որովհետև Իրանն ու Ռուսաստանը, խիստ ուշադրություն դարձնելով խնդրին, կասեցրին հավանական վտանգները:
ՄԱԳԱՏԵ-ն ցանկություն ունի կիբերհարձակումների խնդրի շուրջ հանդիպումներ ունենալ մասնագետների հետ»։
