TRT-ի ռուսական ծառայության փոխանցմամբ՝ Եվրախորհրդարանի նախագահ Մարտին Շուլցը երեկ երկօրյա այցով ժամանել է Թուրքիա: Թուրքիայում Շուլցը հանդիպումներ է ունեցել խորհրդարանի նախագահ Ջեմիլ Չիչեքի, Եվրամիության հարցերով պետնախարար Էգեմեն Բաղըշի և նախագահ Աբդուլլահ Գյուլի հետ:
Բաղըշի հետ հանդիպումից հետո կազմակերպված համատեղ մամուլի ասուլիսի ժամանակ Շուլցը հայտարարել է. «Մենք բոլորս պետք է գործենք իրականությանը համապատասխան: Ներկայումս Կիպրոսի Հանրապետությունը ԵՄ-ի անդամ է: Ես քննադատում են Կիպրոսի կողմից ԵՄ-ի նախագահության ստանձնման դեպքում բանակցությունները չշարունակելու մասին թուրքական կողմի հայտարարությունները: Դա անհնար է»: Շուլցը նաև կարևորել է այն, որ Թուրքիայի նոր Սահմանադրության նախապատրաստումն արվի ԵՄ-ի հիմնական սկզբունքներին համապատասխան:
Ավելի ուշ Շուլցին ընդունել է Թուրքիայի վարչապետ Ռեջեփ Էրդողանը: Այսօր Շուլցը կժամանի Ստամբուլ, ուր կհանդիպի գործարար շրջանակների և կրոնական փոքրամասնությունների ներկայացուցիչների հետ: Բիլգիի համալսարանը Շուլցին շնորհելու է պատվավոր դոկտորի կոչում: