Թուրքական Millyet թերթի փոխանցմամբ՝ ինքնահռչակ Հյուսիսային Կիպրոսի թուրքական հանրապետությունը (ՀԿԹՀ) փոխել է իր անվանումը: ՀԿԹՀ-ի նախարարների կաբինետը որոշել է երկիրն անվանել Կիպրոսի թուրքական հանրապետություն՝ անգլերեն կրճատ տարբերակով CTR:
Այդ որոշումը կայացվել էր դեռևս մայիսի 23-ին: Այդ օրը «հանրապետության» անվանումից բացի, կատարվել են նաև նրա քաղաքացիներին առնչվող փոփոխություններ: ՀԿԹՀ-ի կառավարության որոշմամբ՝ քաղաքացիների անձնագրերի ծագման բաժնում նրանք նշվելու են որպես «թուրք-կիպրացի»:
Այս փոփոխությունները պայմանավորված են նրանով, որ թուրքական սպառնալիքներն ազդեցություն չունեցան ԵՄ-ի վրա և կիպրական հարցը չլուծվեց նախքան հուլիսի 1-ը, երբ Կիպրոսի Հանրապետությունը 6 ամսով կստանձնի ԵՄ-ի նախագահությունը:
Թուրքիան սպառնացել էր այդ 6 ամսում սառեցնել ԵՄ-ի հետ իր հարաբերությունները, իսկ ՀԿԹՀ-ն սպառնացել էր անցնել «Բ» պլանին և վերանվանվել «Կիպրոսի թուրքական պետություն», որով իրեն ճանաչել է Իսլամական համագործակցության կազմակերպությունը, և մնացյալ աշխարհից պահանջել՝ իրեն ճանաչելու այդ անվամբ: