Հարգելի՛ պարոն Սարգսյան:
Զանգվածային լրատվության տարբեր միջոցներով տեղեկություններ տարածվեցին WikiLeaks-ում ներկայացված այն փաստի մասին, որ Հայաստանի Հանրապետությունը, հանձինս իր կառավարության բարձրաստիճան պաշտոնյաների, Իրանի Հանրապետությանն է վաճառել զենք, որը գնվել է Բուլղարիայի Հանրապետությունից:
Մինչ այժմ որևէ պաշտոնական պարզաբանումներ Հայաստանի իշխանությունների կողմից զենքի գնման և վաճառման օրինականության, վճարված գումարների աղբյուրների և ստացված եկամուտների օգտագործման վերաբերյալ չի հրապարակվել:
ՀՀ Սահմանադրության 27 հոդվածի և «Տեղեկատվության ազատության մասին» ՀՀ օրենքի 6-րդ հոդվածի համաձայն՝ խնդրում եմ տրամադրել տեղեկատվություն այն մասին, թե.
1. Հայաստանի Հանրապետությունն ինչքան գումար է ծախսել Բուլղարիայի Հանրապետությունից զինամթերք գնելու համար
2. Հայաստանի Հանրապետությունն ինչքան գումարով է վաճառել նույն զենքը և զինամթերքը Իրանի Հանրապետությանը
3. Հայաստանի Հանրապետության պետական որ մարմինն է որոշում կայացրել Բուլղարիայի Հանրապետությունից զենք գնելու վերաբերյալ
4. Հայաստանի Հանրապետության որ պաշտոնատար անձն է ստորագրել Բուլղարիայի Հանրապետությունից զենքի գնելու և Իրանի Հանրապետությանը նույն զինամթերքը վաճառելու վերաբերյալ պայմանագրերը:
Միաժամանակ խնդրում եմ տրամադրել Հայաստանի Հանրապետության և Իրանի Հանրապետության միջև կնքված զենքի գնման վերաբերյալ պայմանագրի պատճենը:
Համաձայն «Տեղեկատվության ազատության մասին» ՀՀ օրենքի 9-րդ հոդվածի՝ քաղաքացիների տեղեկություն ստանալու գրավոր հարցմանը պատասխան տրվում է այն ստանալուց հետո 5 օրյա ժամկետում:
Ուստի, ելնելով վերը նշվածից` խնդրում եմ տեղեկատվություն ստանալու հարցմանս պատասխանել օրենքով սահմանված կարգով և ժամկետներում:
Հարգանքներով`
կազմակերպության նախագահ` Արթուր Սաքունց
