Մի իրավիճակում, երբ Հայաստանում խորհրդարանական ընտրությունները նոր են ավարտվել և ԱԺ պատկերն արդեն իսկ պարզ է, ԱՄՆ պետքարտուղար Հիլարի Քլինթոնի՝ մեր երկիր կատարելիք այցն իսկապես շատ նշանակալից իրադարձություն է: «Առաջին լրատվական»-ի հետ զրույցում ասաց Քաղաքագետների միության նախագահ Հմայակ Հովհաննիսյանը:
«Միաժամանակ, խնդիրներ կան տարածաշրջանային քաղաքականության հարցերին Հայաստանի մասնակցության և նպատակների ճշգրտման հարցում: Մասնավորապես, խնդիր կա նոր շունչ հաղորդել արդեն վերջնականապես մարած հայ-թուրքական գործընթացին և այս համատեքստում քննարկել ու նոր մակարդակի բարձրացնել ղարաբաղյան հիմնահարցը: Հիլարի Քլինթոնի այցը տարածաշրջանային է, և պատահական չէ, որ նա առաջինը լինելու է Հայաստանում: ԱՄՆ պետքարտուղարը հիմնական պատասխաններն ակնկալում է ստանալ Հայաստանից, ինչից հետո գնալ Վրաստան ու Ադրբեջան»,- ասաց նա:
Ամփոփելով՝ Հմայակ Հովհաննիսյանը նկատեց, որ ամերիկացի բարձրաստիճան պաշտոնյայի այցի ընթացքում ոչ ուղղակի, բայց անդրադարձ կկատարվի նաև ԲՀԿ կողմից նախընտրական շրջանում հայտնված, Եվրասիական միության ստեղծման տեսակետին: «Ակնկալվում է, որ Ռուսաստանի կողմից փորձեր են լինելու Հայաստանը ներքաշել այդ գործընթացի մեջ: Սա նոր հանգամանք է, որն, անշուշտ, նույնպես կշոշափվի Հայաստանի բարձրաստիճան պաշտոնյաների հետ Քլինթոնի հանդիպումներում»,- ասաց նա:
Նշենք, որ ԱՄՆ պետքարտուղարը Երևանում կլինի հունիսի 4-ին: Այցի ընթացքում Հիլարի Քլինթոնը հանդիպումներ կունենա Սերժ Սարգսյանի, այլ պաշտոնյաների, քաղաքացիական հասարակության ներկայացուցիչների հետ: Հայաստանը կովկասյան առաջին երկիրն է Քլինթոնի ուղևորության ցանկում: Այնուհետև ԱՄՆ պետքարտուղարը կմեկնի Վրաստան, ապա` Ադրբեջան: