Ռուսաստանի Դաշնության նախագահ Դմիտրի Մեդվեդևն այսօր ՌԴ առաջին նախագահ Բորիս Ելցինի ծննդավայր Եկատերինբուրգ քաղաքում պաշտոնապես բացեց նրա հուշարձանը:
«Ներկայիս Ռուսաստանը պետք է շնորհակալ լինի Ելցինից, որ ամենադժվար ժամանակաշրջանում երկիրը չշեղվեց իր ընտրած փոփոխությունների ճանապարհից, անցավ դժվարությունների միջով և հիմա առաջ է գնում»,- ասել է Մեդվեդևը արարողության ժամանակ:
Արձանը փակող պաստառը վար իջեցվեց նվագախմբի երաժշտության ներքո, որը կատարում էր Ռուսաստանի ելցինյան ժամանակաշրջանի հիմնը` Գլինկայի «Փառաբանվի՛ր» երաժշտությամբ: Արձանը բաղկացած է մարմարի մի քանի կտորներից` ընդհանուր 15 տոննա քաշով, բարձրությունը 10 մետր է:
Հուշահամալիրի բացումից հետո Մեդվեդևը վարդեր դրեց հուշարձանի մոտ: Երկրի նախագահը նշել է, որ Գեորգի Ֆրանգուլյանի ստեղծած հուշահամալիրն արտացոլում է առաջին նախագահի լավագույն հատկանիշները: «Վճռականություն և կամք, ահա թե ինչ է խորհրդանշում այն: Ինձ թվում է` սրանք հատկանիշներ են, որոնք տարբերում էին ՌԴ քաղաքացի Բորիս Ելցինին»,- ասել է Դ.Մեդվեդևը:
Հուշահամալիրի կառուցման նախաձեռնողներն են Ելցինի հիմնադրամն ու նրա ընտանիքը: Հանդիսավոր արարողությանը մասնակցում էին Բ.Ելցինի կինը` Նաինա Ելցինան, և նրա երկու դուստրը` Տատյանա Յումաշևան և Ելենա Օկուլովան: Այսօր ՌԴ առաջին նախագահը կդառնար 80 տարեկան:
Ակնկալվում է, որ 2011թ.-ին Եկատերինբուրգում կբացվի նաև Ելցինի նախագահական կենտրոնը:
