Ինչպես հայտնում է Reuters գործակալությունը, համաշխարհային տնտեսության վերականգնմանը խանգարում են գործազրկության բարձր մակարդակն ու գների աճը, որոնք կարող են առաջացնել առևտրային հովանավորչություն, ինչպես նաև քաղաքացիական պատերազմ:
Սինգապուրում տեղի ունեցած մամլո-ասուլիսի ժամանակ այսպիսի զգուշացումներով է հանդես եկել Արժույթի միջազգային հիմնադրամի (ԱՄՀ) ղեկավար Դոմինիկ Ստրոս-Կանը:
ՄԱԿ-ի մթերային և գյուղատնտեսական միության տվյալներով, մթերքի համաշխարհային գների գործակիցը գերազանցել է 2008թ.-ի առավելագույն ցուցանիշը: Այս միության նախագահը կոչ է արել իջեցնել ապրանքների գները:
Եգիպտոսում և Թունիսում տեղի ունեցող իրադարձությունները վկայում են մթերային հեղափոխությունների նոր դարաշրջանի սկզբի մասին, կարծում են մասնագետները:
«Առևտրի ներքին մեծ դեֆիցիտ ունեցող երկրների (օրինակ` ԱՄՆ-ի) տնտեսական աճը դեռևս հիմնված է ներքին պահանջարկի վրա: Այն երկրներում, որոնք ունեն ներքին առևտրային պրոֆիցիտ, օրինակ` Չինաստանն ու Գերմանիան, այն պահպանվում է արտահանման ծավալների շնորհիվ:
Երկրների մեջ լարվածության աճի հետ մեկտեղ, մենք կարող ենք ականատես լինել հովանավորչության առևտրի և ֆինանսների ոլորտներում: Իսկ երկրի ներսում լարվածության ժամանակ մենք ականատես ենք լինում սոցիալական և քաղաքական անկայունության, անգամ պատերազմի»,- ասել է Ստրոս-Կանը:
ԱՄՀ նախագահի տվյալներով, մոտակա 10 տարիների ընթացքում ավելի քան 400 մլն մարդ դուրս կգա աշխատաշուկա, որը կառավարությունների համար մեծ մարտահրավեր է:
«Մենք բախվում ենք երիտասարդության «կորուսյալ սերունդ» ունենալու հեռանկարի հետ, որն իր ամբողջ կյանքում ստիպված է տառապել կյանքի վատ պայմաններից և գործազրկության մեծացումից:
Աշխատատեղերի ստեղծումը մեծ խթան կլինի այս վիճակից դուրս գալու համար»,- ապագայի վերաբերյալ իր կանխատեսումներն է ներկայացրել տնտեսագետը:
Այս մասին գրում է RBC-ն:
