Քիչ առաջ եգիպտական պետական հեռուստաալիքներով ելույթ ունեցավ նորանշանակ փոխնախագահ Օմար Սուլեյմանը: Նա հայտարարեց, որ նախագահ Հոսնի Մուբարաքը հանձնարարել է իրեն բանակցություններ սկսել ընդդիմադիր ուժերի հետ:
Նրա խոսքերով, այդ բանակցությունների ընթացքում պետք է մշակվեն սահմանադրության մեջ փոփոխություններ կատարելու առաջարկները:
Օմար Սուլեյմանը խոսել է կառավարության հետագա գործունեության մասին` նշելով, որ առաջիկա օրերին կներկայացվի գործողությունների ծրագիրը, որը ենթադրում է աղքատության, գործազրկության և կոռուպցիայի դեմ պայքար:
Սուլեյմանն ասել է նաև, որ խորհրդարանական ընտրությունների նախընտրական շրջանում դատարանի կայացրած որոշումները պետք է ի կատար ածվեն (խորհրդարանական ընտրությունները Եգիպտոսում կայացել են անցած տարվա վերջին և ուղեկցվել են բախումներով, որոնք ընդդիմադիր ուժերի դեմ կիրառված անօրինականությունների և ընտրությունների արդյունքների կեղծման հետևանք էին – 1in.am):
Սուլեյմանի խոսքերին անմիջապես եղավ արձագանք հենց «Թահրիր» հրապարակից: Al-Jazeera-ի ուղիղ եթերում ընդդիմության ակտիվիստներից մեկը` Հուսամ Ալ-Համալավին, որը նաև հայտնի բլոգեր է Եգիպտոսում, հայտարարեց, որ այս ամենն ուշացած քայլեր են, և միայն խոսում են իշխանության թուլության և մոտալուտ անկման վերաբերյալ:
Ալ-Համալավին նաև ասել է, որ իրենք չեն ճանաչում Օմար Սուլեյմանին և նրան համարում են Մուբարաքի թիմի անդամ: Ալ-Համալավին նաև տեղեկացրեց, որ պատրաստվում են վաղը հարյուր հազարանոց երթերն ուղղել դեպի նախագահական նստավայր` պահանջելով Հոսնի Մուբարաքի հրաժարականը:
Բլոգերը հայտարարել է նաև, որ իրենք տեղյակ են` Մուբարաքն այս պահին գտնվում է Շարմ Ալ-Շեյխ քաղաքի իր նստավայրում:
