Փետրվարի 1-ից առաջին կարգի ալյուրից պատրաստված 600-գրամանոց հացը 210-ի փոխարեն կվաճառվի 240 դրամով: Նման որոշում կայացվեց երկուշաբթի օրը Սյունիքի մարզպետ Սուրիկ Խաչատրյանի և Կապանի տարածաշրջանի հացաթխման ձեռնարկությունների պատասխանատուների հետ հանդիպմանը:
«Ալյուրի, վառելիքի, ձեթի թանկացմամբ է պայմանավորված հացի գնի թանկացումը: Գոնե պետք է վերահսկենք, որ հացի գինը հասանելի լինի կենսաթոշակառուին, որ նա ի վիճակի լինի գնելու իրեն հասանելիք մի կտոր հացը: Կապանում ունենք սոցիալապես անապահով շատ ընտանիքներ: Փետրվարին մարզում կանոնակարգելու ենք նաև առաջին անհրաժեշտության մյուս ապրանքների, նաև` դեղորայքի գները»,- ասաց Սյունիքի մարզպետ Սուրիկ Խաչատրյանը:
Պատասխանելով լրագրողների հարցերին` մարզպետն ասաց, որ միշտ վերահսկվել է, հացաթխման ձեռնարկությունները կամայական որոշումներ չեն ընդունել: Մարզում հացի արտադրությամբ զբաղվող 30-ից ավելի ընկերություններ կան։ Նրանց համագործակցությունից և համերաշխությունից է կախված նաև, որ հացի բիզնեսում գները շատ չտատանվեն։ Գործարարները բանավոր պայմանավորվեցին «աշխատել առանց իրար վնասելու, առողջ մրցակցության սահմաններում»:
Մարզպետը հանդիպել է նաև Սիսիանի, Գորիսի, Մեղրիի տարածաշրջանների հացաթխման ձեռնարկությունների ղեկավարների հետ: Այստեղ էլ հացը կթանկանա 30 դրամով:
Սյունիքի մարզպետարանի կողմից ստեղծված հանձնաժողովը մարզի բոլոր խանութներում իրականացնելու է վերահսկողություն` վաճառվող հացի որակի, քաշի և գնի վերաբերյալ:
«Խախտման դեպքում կպատժվեն մեղավորները, ընդհուպ մինչև արտադրամասի փակում»,- խոստացավ մարզպետը: Ամեն դեպքում, սպառողները ևս պետք է ուշադիր լինեն ու մինչ վճարելը կշռեն հացը` արդյոք այն 600 գրա՞մ է: Լավաշի գները առայժմ անփոփոխ կմնան` հատը 70 դրամ:
