Մի քանի օր շարունակ Եգիպտոսի դեպքերի վերաբերյալ հիմնական լրատվական աղբյուր համարվող Al-Jazeera հեռուստաընկերության նկատմամբ բռնարարքները չեն դադարում:
«Առաջին լրատվականը» երեկ հայտնել էր, որ դադարեցվել էին այս հեռուստաընկերության հեռարձակումները Եգիպտոսից, այդ երկրի իշխանությունները զրկել էին Al-Jazeera-ին երկրի տարածքում գործունեություն իրականացնելու իրավունքից:
Քիչ առաջ հայտնի է դարձել, որ ձերբակալվել են հեռուստաընկերության 6 լրագրողներ, առգրավվել է նրանց հեռուստատեսային տեխնիկան:
Այս մասին հայտնի է դարձել այն բանից հետո, երբ նրանցից մեկին հաջողվել է Twitter միկրոբլոգների կայքում հրապարակել կարճ հաղորդագրություն:
Հնարավոր է, որ այսօրվանից եգիպտական իշխանությունները սկսեն կիրառել այսօրինակ բռնարարքներ, քանի որ նշանակվել է երկրի ներքին գործերի նոր նախարար՝ Մահմուդ Վագդին, որը նախկինում եղել է երկրի քրեակատարողական հիմնարկների ղեկավար, ինչպես նաև Կահիրեի քննչական վարչության պետ:
Նրա նշանակմանը Twitter-ում միանգամից արձագանքել են հազարավոր մարդիկ, որոնք տեղեկացնում են, որ նա Եգիպտոսում հայտնի է որպես երկրում խոշտագումների քաղաքականություն իրականացնող հիմնական անձանցից մեկը:
17-25 Լրագրողներից մեկը գրել է, որ իրավապահները, կարծես, նախապատրաստվում են արտաքսել լրագրողներին Եգիպտոսից:
Եգիպտոսի ազգային հեռուստատեսությամբ քիչ առաջ ցուցադևվեց ռեպորտաժ, ուր Եգիպտոսի նախագահ Հոսնի Մուբարաքի մասնակցությամբ տեղի ունեցավ նոր կառավարության երդմնակալության արարողությունը:
17-48 Al-Jazeera հեռուստաընկերության լրագրողներն ազատ են արձակվել, սակայն նրանց տեսախցիկներն ու այլ սարքերը հետ չեն վերադարձվել: Այս մասին հեռուստաընկերության ուղիղ եթերում հեռախոսով տեղյակ պահեց լրագրողներից մեկը: Նա նաև տեղեկացրել է, որ վաղը կայանալիք հանրահավաքին ընդառաջ, երբ ընդդիմությունը հայտարարել է, որ փողոց է հանելու ավելի քան մեկ միլիոն մարդ, զինվորականները կառուցում են «պատեր», որոնք թույլ չեն տալու ցուցարարներին մտնել մուտք գործել Կահիրեի «Թահրիր» հրապարակ, որտեղ արդեն մի քանի օր է տեղի է ունենում հանրահավաք, իսկ հրապարակը խորհրդանշում է պայքարն այս ռեժիմի դեմ:
Թե ինչպե՞ս են իշխանությունները պատրաստվում ազատել հրապարակն արդեն իսկ այնտեղ գտնվող տասնյակ հազարավոր ցուցարարներից, հայտնի չէ: