«Առաջին լրատվականը» ՀՅԴ-ական պատգամավոր Լիլիթ Գալստյանից և ՀՀԿ-ական պատգամավոր Մանվել Բադեյանից հետաքրքրվեց, թե պետության հետընթացի մասի՞ն չեն խոսում այն փաստերը, որ Հայաստանը «Ա1+»-ին եթեր չտրամադրելու պատճառով հայտնվել է Մարդու իրավունքների եվրոպական դատարանի վճիռները չկատարող երկրների շարքում, և որ ԵԽԽՎ-ում վերստեղծվել է ԼՂ հարցով ենթահանձնաժողով:
Լիլիթ Գալստյանը նշեց, որ հիշյալ փաստերը ցույց են տալիս, որ մենք պետք է կարողանանք մեր ներքին խնդիրները լուծել ներքին կյանքում:
Դաշնակցական պատգամավորն ասաց, որ դրա համար նախ և առաջ քաղաքական կամք է հարկավոր: Նրա կարծիքով`թե՛ «Ա1+» -ի հարցում, թե՛ ԼՂ հարցով ենթահանձնաժողովի վերստեղծման հարցում պատասխանատվության մեծ բաժին ունի քաղաքական մեծամասնությունը:
Մանվել Բադեյանն էլ նշեց, որ պետք չէ մտածել, թե եվրոպական կառույցներում նստած են գերագույն դատավորներ, որոնք էլ որոշումներ են կայացնում:
Ըստ նրա`եվրոպական կառույցների դիրքորոշումներն ունեն բազմաթիվ ենթատեքստեր:
Նա բերեց այն օրինակը, թե Բելառուսի դեմ նույն եվրոպական կառույցները ինչ սանկցիաներ են կիրառում, իսկ «հրեշտակային» Ադրբեջանի մասին ոչ մի խոսք չեն ասում:
Ինչ վերաբերում է «Ա1+»-ին, ապա նա ասաց, որ ինքը այդ խնդրին խորությամբ չի տիրապետում, իրավական գնահատական տալ չի կարող, բայց այդ հեռուստաընկերությանը միշտ էլ մրցույթների մասնակցելու հնարավորություն է տրվել:
«Եթե մենք ունենք քնած հասարակություն, քնած մարդիկ, որոնք իրենց շահերը չեն պաշտպանում, կունենանք սա»,- եզրակացրեց նա:
Նա կոչ արեց, որ մարդիկ պայքարեն և փորձեն խնդիրները լուծել խոհեմ, գրագետ ձևով: