Այս տարի կարտոֆիլի սղության պատճառով գները սովորականից բարձր էին, ինչից ամբողջ տարի դժգոհեցին սպառողները։
Սակայն այսօր արդեն կարտոֆիլի թանկացումից մտահոգված են գյուղացիները, քանի որ շուտով մոտենում է ցանքսի շրջանը։
Այսօր դիմեցինք գյուղնախարարության բուսաբուծության վարչության պետ Գագիկ Մանուչարյանին պարզելու համար՝ արտերկրից սերմացու ներկրվելո՞ւ է, թե՞ ոչ։
«Անցյալ տարի 862 տոննա սերմացու է ներկրվել Հայաստան, այս տարի, նախնական պայմանավորվածությամբ, մոտ 1500 տոննա «Ագրիկոլ» ֆիրման է ներկրելու, և 500 տոննա էլ՝ «Ագրարագյուղացիական» միավորումը։
Նրանք ներկրում են իրենց ֆերմերների համար, որոնք Հայաստանի Հանրապետությունում կարտոֆիլագործությամբ են զբաղվում»,- ավելացրեց Գագիկ Մանուչարյանը։
Մեր հարցին ի պատասխան, թե այս դեպքում ի՞նչ պետք է անեն սովորական գյուղացիները, ավելացրեց. «Նրանք էլ կարող են կանխավճար անել և պատվիրել»։
Մնում է, որ գյուղացիները տեղեկանան, որ նման հնարավորություն կա և, դիմելով գյուղնախարարություն, սերմացու կարտոֆիլ պատվիրեն։
