ԵԱՀԿ-ում ԱՄՆ մշտական ներկայացուցիչ Յան Քելին իր մտահոգությունն է հայտնել Հայաստանում վերջերս անցկացված կապուղիների մրցույթի առնչությամբ՝ ի գիտություն ընդունելով ԱԺ որոշումը 18 կապուղիներ տրամադրելու վերաբերյալ, որոնք պետք է առաջիկա 10 տարիների ընթացքում իրավիճակ ձևավորեն հայկական ԶԼՄ-ներում: Քելին, նշելով, որ այդ ընթացքում պետք է անցկացվեն երկու նախագահական և խորհրդարանական ընտրություններ, մտահոգություն է հայտնել, քանի որ տրամադրված լիցենզիաների քանակը պակաս է եղել հեռարձակողների թվից, ինչը կազդի ԶԼՄ-ներում բազմակարծության վրա: Ամերիկյան կողմը դրական է գնահատել Սերժ Սարգսյանի ընդունած՝ «Հեռուստատեսության և ռադիոյի մասին» ՀՀ օրենքի վերանայման համար հանձնաժողով ստեղծելու որոշումը` միաժամանակ նշելով, որ վերանայման գործընթացը դանդաղ է ընթանում: Նաև մտահոգություն են հայտնել, որ մինչև օրս չեն հրապարակվել հայտարարված մրցույթի հայտերի աուդիտի արդյունքները` կոչ անելով հրապարակել դրանք: Պետդեպարտամենտի կայքում հրապարակված հայտարարության մեջ նաև նշվում է, որ անհրաժեշտ է ազատականացնել հեռահաղորդակցության ոլորտում այլ տեսակի ԶԼՄ-ներին արտոնագրերի տրամադրման գործընթացը, այդ թվում` ինտերնետ-պորվայդերների, արբանյակային ցանցերի և բջջային հեռախոսակապի, ինչը թույլ կտա հեշտացնել ՀՀ քաղաքացիներին բովանդակությունը հասցնելու միջոցները: Քելին նաև կոչ է արել թույլ տալ գոյություն ունեցող բոլոր հեռարձակողներին իրականացնել իրենց հեռարձակումներն այնքան ժամանակ, քանի դեռ չի ավարտվել անալոգային հեռարձակման դադարեցման ժամկետը:
