Այսօր Ֆրանսուա Օլանդը պաշտոնապես ստանձնեց Ֆրանսիայի 24-րդ նախագահի լիազորությունները: Նա դարձավ Ֆրանսիայի 5-րդ հանրապետության 7-րդ նախագահը: Նիկոլա Սարկոզին և Օլանդը փոխանակել են գաղտնի դոսյեն, որի մեջ են մտնում «Միջուկային ճամպրուկի» ծածկագրերը:
Այնուհետև Սարկոզին կնոջ՝ Կառլա Բրունիի ձեռքը բռնած հեռացել է Ելիսեյան պալատից: Սահմանադրական խորհրդի ղեկավար Ժան-Լուի Դեբրեն 400 հյուրերի մասնակցությամբ պաշտոնական միջոցառման ժամանակ Օլանդին հաստատել է նախագահի պաշտոնում: Նրան տրվել է Պատվավոր Լեգեոնի շքանշան:
Իր կարճատև ելույթում Օլանդը խոստացել է արդարացնել բոլոր ֆրանսիացիների, ինչպես նաև եվրոպացիների հույսերը: Այնուհետև նա ուղևորվել է Հաղթանակի կամար, որտեղ, չնայած տեղացող առատ անձրևին, ծաղկեպսակ է դրել անմար կրակի մոտ: Նրա պատվին 21 հրազարկ է տրվել:
Օլանդը հաղթել էր մայիսի 6-ին կայացած ընտրություններում՝ ստանալով ընտրողների 51,6 տոկոսի աջակցությունը:
Այսօր արևմտյան լրատվամիջոցերի ուշադրության կենտրոնում եղել է սուպերմոդել Կառլա Բրունին: Չնայած զգեստապահարանի ճոխությանը, նա հագել էր տափակ կոշիկներ ու համեստ կոստյում… նա այլևս առաջին տիկին չէ:
