ԵԽԽՎ նստաշրջանում հայկական պատվիրակությանը սպասվում է մի քանի տհաճ անակնկալ. նախ՝ ԵԽԽՎ-ն քննարկելու է ռուս-վրացական պատերազմից հետո այդ երկրներում տիրող իրավիճակը: Մինչ այդ էլ հունվարի 21-ին ԵԽԽՎ-ն ընդունել էր բանաձև՝ պահանջելով ռուսական զորքերը դուրս բերել Աբխազիայի և Հարավային Օսիայի տարածքից:
Բացի այդ, ԵԽԽՎ-ն շարունակելու է քննարկել նաև Բելառուսի նախագահի ընտրություններից հետո այդ երկրում տիրող իրավիճակը, այնտեղ մարդու իրավունքների պաշտպանության, քաղբանտարկյալների առկայության հարցը, ինչպես նաև Բելառուսի դեմ պատժամիջոցներ կիրառելու նպատակահարմարությունը:
Տրամաբանությունը ենթադրում է, որ այս խնդիրների վերաբերյալ հայկական պատվիրակությունը պետք է որոշակի միասնական դիրքորոշում ունենա: Մինչդեռ, ընդհակառակն է. ԵԽԽՎ հայկական պատվիրակությունը կարծես թե մատնվել է բախտի քմահաճույքին:
Ընդ որում՝ տպավորություն է, որ նրանց անգամ չի էլ հետաքրքրում, թե ԵԽԽՎ-ն ինչ դիրքորոշում կցուցաբերի հարևան Վրաստանի և ՀՀ ռազմավարական գործընկեր ՌԴ-ի, ինչպես նաև Բելառուսի հանդեպ, որի նախագահին Սերժ Սարգսյանն առաջիններից մեկը շտապեց շնորհավորել:
ԵԽԽՎ հայկական պատվիրակության ղեկավար Դավիթ Հարությունյանից որևէ մեկնաբանություն ստանալը անհնար էր: Զարուհի Փոստանջյանն անընդհատ զբաղված էր՝ նա ելույթ է ունեցել միայն տարածաշրջանի երկրներում խոսքի ազատության վիճակի մասին:
Բացի այդ, ակտիվ աշխատանք է տարել բնապահպանական խնդիրներով: Մասնավորապես՝ նրա նախաձեռնությամբ ԵԽԽՎ-ում ընդունվել է բանաձևի նախագիծ` «Հայաստանի լեռնաարդյունաբերական հանքերի ներկայիս և սպասվող նոր հանքավայրերի շահագործման հետևանքով շրջակա միջավայրի վրա աղետալի ազդեցությունը» վերնագրով:
Դրա տակ ստորագրել է ԵԽԽՎ 24 պատվիրակ, իսկ հայկական պատվիրակության անդամները հրաժարվել են բանաձևի նախագծի տակ ստորագրելուց: Մի խոսքով, ռուս-վրացական խնդիրները ԵԽԽՎ հայկական պատվիրակությանն ամենևին չեն հուզում այն աստիճան, որ պատվիրակության ղեկավար Դավիթ Հարությունյանը նույնիսկ հարկ չի համարում հայտարարել չեզոք դիրքորոշում ունենալու մասին:
Ինչ վերաբերում է Բելառուսին, որի հանդեպ ԵԽԽՎ-ն ցանկանում է պատժամիջոցներ կիրառել, ապա միայն ԲՀԿ խմբակցության պատգամավոր Նաիրա Զոհրաբյանն է ելույթ ունենալու համար հերթագրվել:
Իսկ սա, թերևս, այն պատճառով, որ Նաիրա Զոհրաբյանը` որպես ԱՊՀ դիտորդական խմբի անդամ, ներկա է գտնվել Բելառուսում կայացած նախագահական ընտրություններին:
Ստրասբուրգից մեզ հետ հեռախոսազրույցում Նաիրա Զոհրաբյանը հայտարարեց, թե ինքը ոչ միայն ընտրությունների ժամանակ է եղել Բելառուսում, այլ նաև մասնակցել է հանրահավաքին ու մինչև վերջին րոպեն հետևել դրա ընթացքին:
«Հարկ է նկատել, որ Բելառուսում ժողովրդավարության հետ կապված որոշակի խնդիրներ կան: Ուզում եմ հիշեցնել երկուշաբթի օրը ԵԽ գլխավոր քարտուղար Յագլանդի խոսքերը՝ Բելառուսի մասին, որ իրենք չպետք է ընդհատեն երկխոսությունն այդ երկրի հետ: Այո, ոչ մի պատժամիջոց երբեք դրական արդյունքի չի բերելու, ցանկացած պատժամիջոց, ի վերջո, ուղղված է լինելու ժողովրդի դեմ»,- հայտարարեց նա:
Ուստի՝ Նաիրա Զոհրաբյանը կարծում է, որ ԵԽԽՎ-ն չպետք է պատժամիջոցներ կիրառի Բելառուսի դեմ, այլ՝ շարունակի երկխոսել: Ըստ տիկին Զոհրաբյանի` ԵԽԽՎ-ում Բելառուսի հարցի պարբերաբար քննարկումը բնական է, քանի որ այնտեղ կայացած նախագահական ընտրություններից հետո ներքաղաքական պրոբլեմներ են եղել:
Հիշեցնենք, որ նախագահի ընտրություններից հետո բելառուսական ընդդիմության կազմակերպած բողոքի ակցիաները ուժային կառույցների միջոցով ճնշվեցին, ձերբակալվեցին ընդդիմության լիդերները, և առայսօր Բելառուսը շարունակում է քաղբանտարկյալներ ունենալ:
Նաիրա Զոհրաբյանին հարցրինք՝ տպավորություն է ստեղծվում, թե ինքը պաշտպանում է Բելառուսի շահերը:
«Ես ներկայացնում եմ ԲՀԿ-ն և իմ ելույթներում ներկայացնում եմ ԲՀԿ տեսակետը»,- հակադարձեց նա: Ի դեպ, նկատենք, որ ԲՀԿ առաջնորդ Գագիկ Ծառուկյանը սերտ հարաբերություններ ունի Բելառուսի նախագահ Ալեքսանդր Լուկաշենկոյի հետ, այդ երկրում բիզնես ունի: Ավելին, Ծառուկյանը նույնիսկ անձամբ ներկա էր գտնվել Լուկաշենկոյի երդման արարողությանը:
Հ.Գ. Ի դեպ, Ալեքսանդր Լուկաշենկոն երեկ հայտարարել է, թե չի վախենում ԵԽԽՎ պատժամիջոցներից: «Դուք վախեցնում եք պատժամիջոցներով, վիզային սահմանափակումներով, Աստված Ձեզ հետ: Ես արդեն 10 տարի տարի է, ինչ ապրում եմ վիզային սահմանափակումներով»,- ասել է Լուկաշենկոն:
«Ժամանակ» օրաթերթ
