«Առաջին լրատվական»-ը Հայ ազգային կոնգրեսի համակարգող Լևոն Զուրաբյանից հետաքրքրվեց, թե հնարավոր չէ՞, որ Սերժ Սարգսյանն անցկացնի ԱԺ արտահերթ ընտրություններ և դրանով կարողանա լեգիտիմացնել իր իշխանությունը: «Որևէ բռնապետություն երբեք չի գնա արտահերթ ընտրությունների, եթե դա չդիտարկվի որպես լարվածությունը թուլացնելու ինչ-որ մի հնարավորություն: Անգամ եթե նրանք գնան արտահերթ ընտրությունների, օրինակ՝ առաջարկեն անցկացնել ԱԺ արտահերթ ընտրություններ, ռեժիմի համար դա լինելու է պարտադրված և ստիպողական մի քայլ»,- ասաց ՀԱԿ համակարգողը: Նա վերստին հայտարարեց, որ Հայ ազգային կոնգրեսի պահանջը սկզբում ՀՀ նախագահի, իսկ հետո ԱԺ արտահերթ ընտրությունների անցկացումն է: ՀԱԿ համակարգողն ասաց, որ դա կապահովի երկրի համար լավագույն ընթացքը: Նա չբացառեց, որ Սերժ Սարգսյանն իր պաշտոնը փրկելու համար կարող է անցկացնել ԱԺ արտահերթ ընտրություններ: «Մենք մեր գործն ենք անում, իրենք` իրենցը: Շախմատ է, մենք մեր քայլերն ենք անում, իրենք` իրենցը: Իսկ շախմատում ընդունված է նաև զոհաբերել որոշ բաներ»,- ասաց Լևոն Զուրաբյանը: