Բոլորը հունվարի 28-ն անվանում են Եգիպտոսի նորագույն պատմության ամենավճռական օրերից մեկը: Այսօր ընդդիմությունը 1970-ականներից հետո առաջին անգամ պատրաստվում է փողոց դուրս բերել միլիոնավոր մարդկանց: Դա տեղի կունենա ուրբաթօրյա աղոթքից հետո, և իշխանությունները սրա դեմ ոչ մի քայլ չեն կարող ձեռնարկել:
Աշխարհի շատ երկրների արտգործնախարարություններ զգուշացրել են իրենց երկրների քաղքացիներին Եգիպտոս մեկնելու և անտեղ գտնվելու վտանգավորության մասին:
Իսկ այսօրվա իրադարձություններին խորհրդավորություն է հաղորդում Նոբելյան մրցանակակիր, ՄԱԳԱՏԵ-ի նախկին ղեկավար Մուհամադ Ալ Բարադեի վերադարձը Կահիրե և նրա պատրաստակամությունը՝ դուրս գալ փողոց բողոքավորների հետ ու գլխավորել ընդդիմությունը: Այս մասին «Առաջին լրատվական»-ը տեղեկացրել էր երեկ:
Հայտնի է դարձել նաև, որ բախումները երեկ շարունակվել են, ու կան նոր զոհեր: Այս պահին եղած տեղեկությունների համաձայն, բախումների արդյունքում զոհվել է 7 եգիպտացի, այդ թվում` մեկ զինվորական, հարյուրավոր մարդիկ վիրավորվել են, ավելի քան 1000 հոգի ձերբակալված է:
Բախումները տեղափոխվել են Եգիպտոսի այլ շրջաններ, ինչը ավելի լուրջ լարվածություն է ստեղծում:
Արաբական լրատվամիջոցների հաղորդմամբ, Կահիրեում անջատվել է հեռախոսակապը և ինտերնետը, որպեսզի հնարավոր չլինի կազմակերպել այսօրվա հանրահավաքները: Կահիրե են բերվել բանակի էլիտար զորամիավորումները, որոնք մասնագիտացած են ահաբեկչության դեմ պայքարում:
Քիչ առաջ Twitter-ում եգիպտացիները միմյանց սկսեցին ողջունել «ազատության բարի առավոտ» մաղթանքով:
Արդյոք այդպես կլինի՝ ցույց կտա նոր բացվող օրը: