Հայաստանը հայտնվել է Մարդու իրավունքների եվրոպական դատարանի որոշումները չկատարող երկրների շարքում: Եվրոպայի խորհրդի խորհրդարանական վեհաժողովի ընդունած 1787 բանաձևում նշել է, որ մի շարք երկրներ, ինչպիսիք են, օրինակ, Հայաստանը, Վրաստանը, Ադրբեջանը, Ալբանիան, չեն կատարում ՄԻԵԴ-ի որոշումները:
ԵԽԽՎ-ն նշում է, որ իրավունք է վերապահում համապատասխան գործողությունների դիմել, եթե տվյալ պետությունը շարունակի չձեռնարկել դատարանի վճռով համապատասխան միջոցներ կամ ազգային խորհրդարանը համապատասխան ճնշում չգործադրի Կառավարության նկատմամբ դատարանի վճիռները կատարելու համար: Պարզվում է, որ ԵԽԽՎ-ին զայրացրել է «Ա1+»-ի գործով Եվրադատարանի որոշման չկատարելը:
«Առաջին լրատվական»-ը իրավաբան, «Մելտեքս» ՍՊԸ-ի ներկայացուցիչ Արա Ղազարյանից հետաքրքրվեց, թե ինչ իրավական հետևանքներ կարող է ունենալ այդ բանաձևը: Արա Ղազարյանը նշեց, որ ԵԽ նախարարների կոմիտեն դիմում է Մարդու իրավունքների եվրոպական դատարան, որն էլ հարուցում է դատական վարույթ, որն էլ պետք է վճիռ կայացնի` տվյալ պետությունը կատարու՞մ է ՄԻԵԴ-ի վճիռը, թե՞ ոչ: Մեր զրուցակիցը տեղեկացրեց, որ մինչ օրս չի եղել որևէ նախադեպ, որ ԵԽԽՎ-ն հետևեր, թե ՄԻԵԴ-ի վճիռները կատարվու՞մ են, թե՞ ոչ:
Արա Ղազարյանը, որը ՄԻԵԴ-ին է ներկայացրել «Ա1+» հեռուստաընկերության իրավունքների խախտումները, ուշադրություն է հրավիրում այն փաստի վրա, որ 2008 թ. ՄԻԵԴ-ը «Ա1+»-ի հարցով կայացրեց որոշում, համաձայն որի` խախտվել է Մարդու իրավունքների եվրոպական կոնվենցիայի 10-րդ հոդվածը («Արտահայտվելու ազատություն»): Սակայն այդ վճիռը չի կատարվել: