Մշակույթի նախարար Հասմիկ Պողոսյանը ոչ մի վատ բան չի տեսնում Էստրադային և ջազային արվեստի պետական քոլեջի և մշակույթի քոլեջի միացման մեջ. «Կրթական համակարգը այդ միացումից որևէ ձևով չի տուժելու, ճիշտ է միացումից հետո 4 փոխտնօրենի փոխարեն կմնան երկուսը, կլինի մեկ հաշվապահ: Վերամիավորման և նոր մասնագիտությունների ավելացման պարագայում մարդկանց անհանգստությունը կարծում եմ շատ սուբյեկտիվ մոտեցում է, և շահարկվում է, որ քոլեջը վերանում է, մասնագիտությունները վերանում են և այլն, և այլն:
Իհարկե չեն վերանում: Երեկ վարչապետի մոտ խորհրդակցության ժամանակ խոսվեց այդ կրթական մակարդակի խոշորացման մասին: Էստրադային կամ դասական ժանրի մասնագիտությունները չեն կարող դուրս մղվել դաշտից, բայց որ նոր մասնագիտություններ կավելանան, դա հաստատ: Խոսքն ընդամենը բազայաին քոլեջի ստեղծման մասին է, որովհետև մենք այլընտրանք չունենք:
Այդ քոլեջները կվերամիավորվեն, և բոլոր մասնագիտությունները կմիանան իրար: Իսկ մյուս ուսումնական կրթական տարում չի բացառվում, որ մենք ավելացնենք նոր մասնագիտություններ, որոնք այսօր մեզ օդի պես անհրաժեշտ են:
Մեր թատերական գործիչներին որևէ միջին մասնագիտական կրթական հաստատություն այսօր չի պատրաստում և դա չգիտեմ ինչու ոչ մեկին չի անհանգստացնում, բայց այն, ինչ ունենք, պահպանում ենք, այն, ինչ չունենք, պետք է ստեղծենք»:
