Ադրբեջանական 1news.az-ի փոխանցմամբ՝ ԵՄ արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնը Business Year-ի՝ Ադրբեջանին նվիրված հատուկ համարին տված հարցազրույցի ժամանակ անդրադարձել է ԵՄ-Ադրբեջան հարաբերություններին.
«Ես Ադրբեջան եմ այցելել 2011 թվականի վերջին, ինչը վկայում է այդ երկրի հետ հարաբերություններին մեր տված կարևորության մասին: Ադրբեջանը ԵՄ-ի կարևոր գործընկերն է էներգետիկ հարցերում: Էներգետիկ հարցերով եվրոկոմիսար Գյունթեր Օթթինգերը բավական սերտ աշխատում է այդ երկրի հետ:
Ադրբեջանը ողջ Հարավային Կովկասի կարևորագույն խաղացողն է, ինչն էլ հաստատվեց ՄԱԿ ԱԽ-ին նրա ժամանակավոր անդամակցությամբ: «Արևելյան գործընկերություն» ծրագիրը կարևոր միջոց է ԵՄ-ի ու Ադրբեջանի միջև սերտ համաործակցության համար:
ԵՄ-ի դերը տարբերվում է ԵԱՀԿ Մինսկի խմբի դերից, որն անմիջականորեն ներգրավված է Ղարաբաղյան հակամարտության կարգավորման գործընթացում: Ես հատուկ ներկայացուցիչ եմ նշանակել, որը տվյալ գործընթացին աջակցելու է այնքանով, որքանով որ դա հնարավոր է անել ԵՄ-ի շրջանակներում: Օրինակ՝ նա կարող է նպաստել հակամարտող կողմերի միջև վստահության մթնոլորտի ամրագրմանը»:
