«Կենսաթոշակառուներն ահազանգում են, որ իրենց դեռևս չի վճարվել ապրիլ ամսվա կենսաթոշակը՝ այն դեպքում, երբ նախորդ ամսվանը սովորաբար վճարվել է հաջորդ ամսվա 2-ին կամ 3-ին: Նրանց բացատրվել է, թե պատճառն այն է, որ կանխիկ գումար չկա: ՀՀ աշխատանքի և սոցիալական հարցերի նախարարությունից այս առնչությամբ մեկնաբանություն ստանալ մեր թղթակցին չի հաջողվել: Սոցապահովության ծառայությունից էլ, թեև ոչ պաշտոնապես, պնդել են, որ կենսաթոշակները վճարվել են, ու որևէ խնդիր չկա»,- գրում է «ՀԺ»-ն և հավելում.
« Իսկ ահա ՎՏԲ բանկից ստացված գրավոր պատասխանից ակնհայտ է դառնում, որ ոչ բոլորին է վճարվել ապրիլի կենսաթոշակը:
«Ապրիլ ամսվա կենսաթոշակը վճարվել է ժամանակին, այսինքն՝ մեկ օրվա ընթացքում, ինչպես և նախատեսված է կենսաթոշակային հաշվի սպասարկման պայմանագրի պայմաններով: Կենսաթոշակը վճարվել է այն հաճախորդներին, որոնք, համաձայն կենսաթոշակների ծառայությունների մատուցման պայմանագրով նախատեսված պայմանների, ներկայացրել են իր ողջ լինելու մասին ՀՀ-ում գործունեություն իրականացնող նոտարի հաստատած փաստաթուղթը կամ տվել են այդ մասին հայտարարություն բանկում»,- ասվում է ՎՏԲ-ի պատասխանում:
Անտեսենք այդ անհոգի մոտեցումը, որ կենսաթոշակառուից իր ողջությունն ապացուցող տեղեկանք է պահանջվում, բայց երբ նա գնում և հետաքրքրվում է իր կենսաթոշակով, անհրաժեշտ տեղեկանքի մասին նրան ոչինչ չի ասվում: Մեր տեղեկություններով, կենսաթոշակները չի վճարվել հազարավոր կենսաթոշակառուների»:
