ՌԴ նախագահ Վլադիմիր Պուտինը խնդրել է Պետդումային վարչապետի պաշտոնում հաստատել Դմիտրի Մեդվեդևին:
«ՌԴ Սահմանադրության համապատասխան՝ խնդրում եմ ձեզ համաձայնել Դմիտրի Մեդվեդևին նշանակել վարչապետի պաշտոնում»,- ասել է երկրի ղեկավարը:
Պուտինի կարծիքով՝ Մեդվեդևը բաց կլինի բոլոր կուսակցությունների հետ կառուցողական համագործակցության համար: Նախագահը բնութագրել է Մեդվեդևին՝ որպես փորձառու քաղաքական գործչի, որը նպատակաուղղված է բարեփոխումների ու զարգացման և, որը անկեղծ սիրում է իր հայրենիքը:
Նա հիշեցրել է, որ հենց Մեդվեդևի նախաձեռնությամբ է Պետդուման ընդունել հակակոռուպցիոն մի շարք օրենքներ: Հենց նա է նախաձեռնել քաղաքական կուսակցությունների մասին օրենքի փոփոխությունը:
Պետության ղեկավարը հիշեցրել է, որ Մեդվեդևին վարչապետի պաշտոնում առաջադրելու որոշումը բարձրաձայնվել է դեռևս նախագահական ընտրությունների քարոզարշավի ժամանակ: Նրա խոսքերով` այդ դիրքորոշումը հանրությանը վաղուց է ներկայացվել, և դա էլ ապացույց է, որ ոչ մի քաղաքական խաղ չկա:
