Թիվ 6 ընտրատարածքում ՀԱԿի կողմից առաջադրված պատգամավորի թեկնածու Ավետ Պողոսյանի ընտրական շտաբը հայտարարություն է տարածել.
«Ինչպես ամբողջ Հայաստանում, այնպես էլ թիվ 6 ընտրատարածքում մայիսի 6-ին կայացած ԱԺ ընտրությունները անցան խայտառակ պայմաններում. համատարած բաժանված ընտրակաշառքը, վարչական ռեսուրսի օգտագործումը, ակնհայտ ճնշումները ընտրողների կամարտահայտման վրա, տեղամասերում արհեստական հերթերը և դրա հետևանքով ընտրախախտումների համար լայն դաշտի հնարավորության բացելը, անճշտությունների և անվավեր քվեաթերթիկների մեծ թիվը, այս ընտրությունների բնութագրիչն էին:
Թիվ 6 ընտրատարածքում արդյունքները որևէ առնչություն չունեն աջափնյակցիների իղձերի, պատկերացումների և ընտրության հետ:
Նման միջոցների արդյունքում ձևավորված իշխանությունը չի կարող ծառայել սեփական ժողովրդին. սա մեր ժողովրդի իշխանությունը չէ: Եթե իշխող ՀՀԿ-ն սա հաղթանակ է համարում, ապա սա իրենց հաղթանակն է միայն ու բացառապես ժողովրդի նկատմամբ:
Երախտապարտ ենք Հայ ազգային Կոնգրեսի Աջափնյակի տարածքային կառույցին, կառույցի բոլոր անդամներին, մեր բոլոր վստահված անձանց` գործին անվերապահ լծվելու համար, ինչպես նաև այն բոլոր քաղաքացիներին, ովքեր և նախընտրական շրջանում և ընտրությունների օրը տեղամասերում և տեղամասերից դուրս անմնացորդ պայքարեցին` քաղաքացիների քվեները պահելու համար:
Շնորհակալ ենք նաև այն բոլոր քաղաքացիներին, ովքեր չընկրկեցին իշխանությունների ճնշումների առաջ և կամ` ազատ քվեարկեցին ընդդիմության օգտին, կամ էլ` իշխանությունների իրենց պարտադրած կարուսելը խափանելու համար` արդեն իսկ իշխանության օգտին քվեարկած և իրենց տրված քվեաթերթիկները դարձրեցին անվավեր` այդպիսով իրենց բողոքն արտահայտելով ընտրությունների խայտառակ ընթացքի հանդեպ:
Մարդկային ազատությունների և մարդու արժանապատվության վրա հիմնվող հասարակական փոխհարաբերություները և դրա արդյունքում ձևավորված իշխանությունը այլընտրանք չունի: Հայաստանը պետք է և ունենալու է իրապես ժողովրդի կողմից ընտրված և մարդկանց հաշվետու իշխանություն: Մեր պայքարը շարունակվելու է այնքան ժամանակ, քանի դեռ ՀՀ քաղաքացիները չունեն իրենց կողմից ընտրված և օրինակարգ իշխանություն»:
