Թուրքական Hürriyet թերթի փոխանցմամբ՝ Թուրքիայի զինված ուժերի գլխավոր շտաբի պետ, գեներալ Նեջդեթ Օզելի գլխավորած ռազմական պատվիրակությունն այսօր մեկնել է ԱՄՆ, ուր պետք է գտնվի մինչև մայիսի 10-ը:
Թուրքիայի գլխավոր շտաբի տարածած հայտարարության համաձայն՝ Օզելի ամերիկյան այցի հիմնական նպատակը երկկողմանի ռազմական համագործակցության խորացումն է, ինչպես նաև Սիրիայում տիրող իրավիճակի քննարկումը: Կողմերի ուշադրության կենտրոնում կլինի նաև Թուրքիայում ահաբեկչական հռչակված և արգելված Քրդստանի աշխատավորական կուսակցության (PKK) դեմ պայքարը:
Այսօր Օզելի պատվիրակությունը կայցելի Հյուսիսային Կարոլինա նահանգի Ֆորտ Բրեգգ քաղաքում գտնվող «Պոուպ» ավիաբազա, իսկ վաղը Օզելը Վաշինգտոնում կհանդիպի ԱՄՆ զինված ուժերի շտաբների միացյալ կոմիտեի ղեկավար, գեներալ Մարտին Դեմփսիի հետ: Հենց վերջինիս հրավերով էլ տեղի է ունենում Օզելի ամերիկյան այցը:
Սակայն թուրք վերլուծաբանները պատահական չեն համարում Օզելի այս այցի համընկնումը վարչապետ Էրդողանի այն հայտարարության հետ, որ Անկարան խնդրելու է ՆԱՏՕ-ի ռազմա-տեխնիկական աջակցությունը, եթե սիրիական զորքերը շարունակեն խախտել թուրքական սահմանը:
