Թուրքական Cumhuriyet թերթի փոխանցմամբ՝ ի հայտ է եկել Ադոլֆ Հիտլերի թուրքական գաղտնի պլանը: Վերջին 20 տարիներին Գերմանիայում բնակվող թուրք հետազոտող Շենոլ Շահին Չորեքչին հետազոտել է Օսմանյան և հանրապետության (քեմալական) ժամանակաշրջաններում թուրք-գերմանական հարաբերությունները:
Չորեքչին նշել է, որ Հիտլերը զեկույցներ է պատրաստել տվել այն երկրների մասին, որոնք պլանավորել է զավթել. «Այդ երկրների թվում ընդգրկվել է նաև Թուրքիան: Հիտլերի ամենամեծ նպատակների թվում են եղել Արաբական թերակղզու ու Ադրբեջանի նավթահանքերի և Թուրքիայի բորի հանքերի զավթումը:
1935-1941 թվականներին Թուրքիայի վերաբերյալ կազմվել է 217 էջանոց զեկույց, որում ամենայն մանրամասնությամբ նշվել են Թուրքիայի տարածքի մեծությունը, սահմանները, բնակչությունը, քաղաքական առանձնահատկությունները, կլիման, երկրաշարժի ու հիվանդությունների գոտիները, հոսող ջրերը, ջրային պաշարները, արտադրանքը, օդանավակայանները, նավերը, հանքերը, ճանապարհները, զինվորական շրջանները, գրագիտության մակարդակը և այլն»:
