«Այդ ամենն արվեց, որ առաջացած խուճապի ժամանակ տուժածների թիվը չավելանա»,- ասաց հաղորդավար Ավետ Բարսեղյանը՝ երեկ Հանրապետության հրապարակում ստեղծված արտակարգ իրավիճակի ընթացքում շարունակվող համերգի վերաբերյալ: Իսկ խուճապը զսպել ստացվե՞ց՝ հարցին էլ պատասխանեց. «Իհարկե, ստացվեց, հակառակ դեպքում մենք կունենայիք շատ ավելի տուժածներ»:
Նա ասաց, որ ինքն էլ կանգնած է եղել ժողովրդի մոտ: Հարցին՝ ճիշտ տարբերակը արդյոք համերգը շարունակե՞լն էր, պատասխանեց, որ երբ արտակարգ իրավիճակ է, ճիշտ և սխալ ման գալը շատ տարօրինակ է.
«Այդ ժամանակ Լեյլան ամենաառաջինը վերցրեց իր վրա, ինչի համար բռավո Լեյլային, ամեն մարդ յուրովի է տանում տարբեր տեսակի արտակարգ իրավիճակները: Մենք ամեն օր չենք ապրում արտակարգ իրավիճակներ, որ կարողանանք հասկանալ՝ ինչպես մեզ պահենք»,- ասաց Ավետ Բարսեղյանը՝ նշելով, որ իրենց համար էլ սթրես էր կատարվածը և այդ դեպքում՝ ինքնատիրապետումը և էմոցիայից դուրս գալը գերպրոֆեսիոնալիզմի արդյունք է և փրկության միջոց, բեմի կանոնակարգ:
«Մարդիկ տաք գլխով սխալ բաներ էլ են մտածում, սառը վիճակում ավելի ճիշտ է գնահատական տալ»,- նշեց Ավետ Բարսեղյանը:
Համերգը շարունակելու որոշումը ձե՞րն էր՝ հարցին էլ ասաց, որ չի կարող պատասխանել. «Մենք անընդհատ չենք շարունակել, նախ՝ կարևոր է, որ երաժշտության ձայները, որ այդ րոպեին հնչում էին, բեմից չէին հնչում, Գյումրիից ուղիղ եթեր էր միացված, մոտավորապես մի քանի րոպե ոչ մեկը չի շարունակել, խուճապ էր բոլորիս մոտ»:
