Թբիլիսիի բնակչուհի Մանանա Մամիսաշվիլին վիճակախաղում շահել է 2.632 մլն լարի (1.6 մլն դոլար): Շահող տոմսը խաղարկվել է երեկ երեկոյան «Վրաստանի վիճակախաղային ընկերության» կազմակերպած 240 տոմսերի խաղարկության ժամանակ: Այս մասին հայտնում է ITAR-TASS գործակալությունը:
Ինչպես լրագրողներին հայտնել է Մամիսաշվիլին, ինքը միայն այսօր է իմացել իր շահումի մասին, երբ տեղական հեռուստաալիքով հաղորդվել էր այն մասին, որ ջեքփոթը շահել են: «Ես միայն այսօր ստուգեցի իմ տոմսը ու պարզեցի` շահել եմ»,- հայտարարել է նա: Կնոջ խոսքով` ինքը դեռ չգիտի` ինչ է անելու գումարը:
Վիճակախաղի կազմակերպիչների որոշմամբ` կպարգևատրվի նաև այն վաճառողը, որի մոտից կինը ձեռք է բերել տոմսը: Որպես պարգևատրում` վաճառողը կստանա 52 հազար լարի (32 հազար դոլար):
2009 թ. հոկտեմբերի 1-ից գործող վիճակախաղի արդեն 3-րդ ջեքփոթն է: Առաջին ու ամենախոշոր շահումը բաժին էր ընկել աբխազ փախստական Զամիրա Տորդինավային (2010 թ.), ով շահել էր 4.4 մլն լարի (այն ժամանակվա կուրսով` 2.5 մլն դոլար)։