Վաղը Ֆրանսիայում տեղի է ունենալու նախագահական ընտրությունների երկրորդ փուլը: Այս փուլի ընթացքում մրցելու են գործող նախագահ Նիկոլա Սարկոզին և սոցիալիստ թեկնածու Ֆրանսուա Օլանդը: Ֆրանսիայում իրականացվող սոցիոլոգիական հարցումների արդյունքում առաջատար դիրքերում է սոցիալիստ թեկնածուն: «Առաջին լրատվական»-ը փորձեց պարզել, թե Ֆրանսիայում նախագահական ընտրությունների նախօրեին ինչ տրամադրություններ կան հասարակության շրջանում:
«Փարիզյան սուրճ»-ի նախկին սեփականատեր, ֆրանսահայ Աշխեն-Վալերի Գործունյանը նշեց, որ
Ֆրանսիան կիսված է երկու թեկնածուների միջև, դա և մտահոգիչ է, որովհետև Ֆրանսիայում հասարակությունը բաժանված է աջերի և ձախերի: «Մենք մտածում ենք, որ երևի Ֆրանսուա Օլանդը կշահի, որովհետև Ֆրանսիայում անցկացված սոցիոլոգիական հարցումների տվյալներով՝ նա առջևում է: Ժողովուրդը պետք է որոշի. եթե մեծամասնությունը պետք է Օլանդին ընտրի, ուրեմն նա պետք է դառնա նախագահ, և իրեն մաղթում ենք, որ ճիշտ քաղաքականություն տանի, որ Ֆրանսիան ավելի մեծ տնտեսական խնդիրներ չունենա: Բայց ես, այնուամենայնիվ, իմ քվեն տալու եմ Նիկոլա Սարկոզիին, թեև մենք ընտանիքով մի քիչ ավելի ձախի կողմն ենք»,- ասաց Գործունյանը` հավելելով, որ 10 տարի ձախերը կառավարել են, այսօր հերթն աջերինն է: Նա նկատեց, որ գործող նախագահ Սարկոզիի նկատմամբ մեծ հակակրանք է ստեղծվել, և Ֆրանսիայում շատերը Սարկոզիի կերպարը չեն սիրում:
Հարցին՝ ո՞րն է դրա պատճառը, պատասխանեց, որ նա մի քանի սխալ է արել, և դա նման պատկեր է ձևավորել: «Երբ նա առաջին անգամ ընտրվեց նախագահ, շատ թանկ ռեստորանում տոնեց իր հաղթանակը, որը հասարակությանը դուր չեկավ: Դա նրա առաջին սխալն էր, քանի որ ժողովուրդը նման բաներ չի սիրում: Երկրորդ սխալն այն էր, որ ամեն տարի Ֆրանսիայում կազմակերպվող գյուղատնտեսական մեծ ցուցահանդեսին Սարկոզին գնաց և ներկաներից մեկին հայհոյեց այն բանից հետո, երբ իրեն հայհոյել էին»,- պատմեց Գործունյանը` հավելելով, որ դա անընդունելի է Ֆրանսիայում: Նա նշեց, որ մեծ թվով ձախ ընկերներ ունի, որոնք սկզբունքորեն չեն քվեարկելու գործող նախագահի օգտին:
Աշխեն-Վալերի Գործունյանը նաև իր մտահոգությունը հայտնեց երեկ Հանրապետության հրապարակում տեղի ունեցած պայթյունի վերաբերյալ՝ ասելով, որ զարմանում է, թե ինչպես համերգը չդադարեցվեց: Ըստ նրա` նման միջադեպերի հնարավորությունը պետք է լավ պատրաստված լինի և համապատասխան միջոցներ ձեռք առնվեն:
