Գուանտանամոյի (ԱՄՆ) ամերիկյան ռազմաբազայում այսօր սկսվում է 2001թ. սեպտեմբերի 11-ի ահաբեկչության ենթադրյալ կազմակերպիչ Խալիդ Շեյխ Մուհամմադի և նրա 4 համախոհների դատավարությունը: Փորձագետներն ակնկալում են, որ դատավարությունը, որը կանցկացնի հատուկ զինվորական հանձնաժողովը, կտևի առնվազն մեկ տարի:
Ինչպես հաղորդում է ITAR-TASS-ը, ենթադրվում է, որ գործի բոլոր կասկածյալներին մեղադրանք կներկայացվի ահաբեկչության, օդանավ առևանգելու, զանգվածային սպանության, քաղաքացիական անձանց վրա հարձակվելու, դավադրության և մասնավոր ու դաշնային սեփականության ոչնչացման համար: Պենտագոնի տարածած հայտարարության մեջ ասվում է, որ նրանք «պատասխանատվություն են կրում 2001թ. սեպտեմբերի 11-ին Նյու Յորքում, Վաշինգտոնում, Շենքսվիլում իրագործված հարձակումների կազմակերպման և իրականացման համար, որոնք հանգեցրել են 2976 զոհի»:
Զինվորական դատախազները հաստատել են, որ կհասնեն նրանց համար մահապատժի դատավճռի կայացման: Իրենց հերթին փաստաբանները կփորձեն համոզել, որ իրենց պաշտպանյալներից վկայություններ են վերցվել խոշտանգումների ճանապարհով: Սակայն պաշտպանության այդ մարտավարությունը կիրառելի չի լինի Խալիդ Շեյխ Մուհամմադի դեպքում. նա ոչ միայն խոստովանում է իր մեղքը, այլև ինքն է իրեն պատասխանատու համարում սեպտեմբերի 11-ի ահաբեկչությունների կազմակերպման համար: Նա ձերբակալվել է 2003թ. Պակիստանում՝ ամերիկյան և պակիստանյան հատուկ ծառայությունների համատեղ գործողությունների արդյունքում:
Մեծ արձագանքի պատճառով դատական լսումները կընթանան փակ ռեժիմով: Դրանց չեն կարող ներկա լինել անգամ մեղադրյալների հարազատները. նրանք դատավարությանը կհետևեն հատուկ սենյակից՝ դատարանի դահլիճից ուղիղ հեռարձակմամբ:
