Սան Ֆրանցիսկոյի Դաշնային պահուստային բանկի (ԴՊԲ) ղեկավար Ջոն Ուիլյամսը համոզված է, որ ամերիկյան տնտեսությանը փայլուն ապագա է սպասում:
Ինչպես հաղորդում է Reuters-ը, բանկիրը պնդում է, որ պահուստային բանկի՝ մինչև 2014թ. ցածր տոկոսադրույք պահպանելու որոշումը պայմանավորված է մի շարք գործոններով:
Ուիլյամսի խոսքերով՝ ԱՄՆ-ը պետք է դիմակայի ներքին և արտաքին սպառնալիքներին. դա և եվրոպական պարտքային ճգնաժամն է, և ազգային արտոնյալ հարկային ծրագրերի գործունեության ավարտը: Գլխավոր խնդիր է շարունակում մնալ գործազրկությունը:
ԴՊԲ-ի ղեկավարն իր դիրքորոշումը հայտնել է ուրբաթ՝ մի քանի ժամ հետո այն բանից, երբ հրապարակվեցին Աշխատանքի նախարարության նոր տվյալները: Ըստ դրանց՝ գործատուները չեն շտապում նոր աշխատակիցներ վարձել, իսկ գործազրկության մակարդակը ապրիլին ընկել է մինչև 8.1%, սակայն դրա հիմնական պատճառն այն է, որ շատ ամերիկացիներ դադարել են աշխատանք փնտրել:
Եվ այնուամենայնիվ, Ուիլյամսը հավատում է, որ ԱՄՆ տնտեսությունն «արդեն ի վիճակի է ինքնուրույն աճել»: ԴՊԲ-ի ղեկավարի կարծիքով՝ ամերիկյան Կենտրոնական բանկի գործողությունները ի վիճակի են տնտեսական համակարգին տալ լրացուցիչ խթան, որը հնարավորություն կտա արագացնել նրա զարգացումը: Բանկիրի կանխատեսումը գործազրկության վերաբերյալ բավական պահպանողական է հնչում: Նա կարծում է, որ մինչև տարվա վերջ այն կպահպանվի 8% մակարդակի վրա կամ մի փոքր ավել, իսկ մյուս տարի մի փոքր կնվազի: ՀՆԱ աճը, Ուիլյամսի կարծիքով, այս տարի կկազմի 2.5%, իսկ հաջորդ տարի՝ 2.75%: