Թիվ 30 ընտրատարածքի անկուսակցական թեկնածու Էդմոն Մարուքյանը մամուլի ասուլիսով ամփոփեց քարոզարշավը` վեջին մեկ շաբաթը որակելով հաղթարշավ. «Մենք հաղթական ընթացքի մեջ ենք, մեր քարոզարշավը վեր է ածվել, մի այնպիսի արշավի, որը կարծրատիպեր է կոտրում, որը ցույց է տալիս, որ ամբողջ համակարգին դեմ գնալով՝ կարելի է հասնել հաջողությունների»:
Թեկնածուն քարոզարշավը հանգիստ որակեց, թեպետև նրա առաջ փակել են դպրոցների դռները, պատռել են պաստառները. «Մենք այնքան ուժեղ ենք, որ դրանից ավելի ոչ մի բան չեն կարողացել անել»,- ասաց Է. Մարուքյանը:
Նա հանդես եկավ ուղերձով. «5 տարին մեկ մենք հնարավորություն ենք ունենում ազատ, արդար ընտրություններ անցկացնելու, և ամեն անգամ դա չանցկացնելով՝ սկսում ենք բողոքել, քննադատել մեկս մյուսիս: Իրավիճակի փոփոխությունը պետք է սկսել թիվ 30 ընտրատարածքից: Այս ընտրատարածքը յուրահատուկ է, որովհետև բախվում են քաղաքական բոլոր ուժերը և քաղաքացիական հասարակությունը: Ես քաղաքացիական հասարակության ներկայացուցիչն եմ և տարիներով պայքարում եմ փայփայված արժեքների համար, կոչ եմ անում՝ մի վախեցեք ճնշումներից ու մի վաճառեք ձեր ձայները»:
Նա անդրադարձավ քաղաքում շրջանառվող ասեկոսեներին, թե իբր նրան դատավորի կամ քննիչի պաշտոն է խոստացել ՀՀԿ-ի սատարած թեկնածուն` Վիկտոր Դալլաքյանը. «Ես որևէ մեկի մարդը չեմ, դատավոր ու քննիչ աշխատելու համար չեմ առաջադրվել, ԱԺ գնում եմ՝ որպես երիտասարդ ուժ, դատական բարեփոխումների և մարդու իրավունքների իմ ծրագրով»:
