Այսօր լրագրողների հետ հանդիպման ժամանակ ՀԱԿ համամասնական ցուցակով առաջադրված պատգամավորության թեկնածու, ՀԺԿ ղեկավար Ստեփան Դեմիրճյանը արձագանքելով «Ժառանգություն» կուսակցության փոխնախագահ Ռուբեն Հակոբյանի այն հայտարարությանը, թե ՀԱԿ-ի և ԲՀԿ-ի միջև քաղաքական ամուսնություն է կնքվել՝ ասաց, որ դրա մասին խոսք լինել չի կարող:
Ըստ նրա՝ լավ կյանքից չէ, որ այդպիսի միասնական շտաբներ են ստեղծվում: «Բոլորս հոգնել ենք այդ խոսակցություններից: Պետք է պարզապես նորմալ ընտրություններ անել, իսկ դա իշխանությունը կարող է ապահովել, սակայն կեղծիքները կրում են համակարգային բնույթ, իսկ սոցիոլոգիական հարցումները ֆոնն են պահպանում»,- նշեց Ստեփան Դեմիրճյանը՝ հավելելով, որ ամբողջական գնահատական կտա ընտրություններից հետո, սակայն, նրա խոսքով, այս իշխանությունները և արդար ընտրություններն անհամատեղելի են: Ստեփան Դեմիրճյանի կարծիքով՝ իշխանության կողմից առավելագույնս օգտագործվում են վարչական ռեսուրսն ու ընտրակաշառքը:
Հարցին՝ ինչպե՞ս է գնահատում ՀԱԿ-ի շանսերը, Ս. Դեմիրճյանը պատասխանեց՝ կանխատեսումներ չի ցանկանում անել, սակայն ՀԱԿ հանդիպումներն ընտրողների հետ, երեկվա ամփոփիչ հանրահավաքը հիմք են տալիս ենթադրելու, որ ՀԱԿ-ը ծանրակշիռ ներկայություն կունենա ԱԺ-ում: Ըստ նրա՝ ՀԱԿ հանդիպումներին մարդիկ գալիս են կամավոր, տարատեսակ ճնշումներ են կիրառվում, որպեսզի մարդիկ չգան հանրահավաքի, սակայն միևնույն է՝ վերջին հանդիպումները շատ ջերմ էին, և մարդիկ ակնկալիքներ ունեն ՀԱԿ-ից:
Անդրադառնալով ՀԱԿ մեծամասնական թեկնածուներին՝ ՀԺԿ նախագահն ասաց, որ շատերը հաղթող թեկնածուներ են, եթե, իհարկե, կրկին շատ ընտրակեղծիքներ չլինեն: Ս. Դեմիրճյանը դրական համարեց միջազգային դիտորդների ներկայությունը՝ հավելելով, սակայն, որ պետք չէ նրանց հետ կապել ամեն ինչ: «Պետք է հասարակությունը չհանդուրժի կեղծիքներ»,- նկատեց ՀԺԿ ղեկավարը: Նա նաև գերադասեց ՀԱԿ կազմելիք կոալիցիայի մասին խոսել ընտրություններից հետո:
Ստեփան Դեմիրճյանի կարծիքով՝ եթե ՀԱԿ-ը հայտնվի ԱԺ-ում, կշահի հասարակությունը, քանի որ ԱԺ-ում կլինի սկզբունքային ուժ, իսկ հակառակ դեպքում կկորցնի հասարակությունը:
