Չնայած Ռոբերտ Քոչարյանի գրասենյակի ղեկավար Վիկտոր Սողոմոնյանը շաբաթներ առաջ հայտարարել էր, թե ընտրություններին մոտ Ռոբերտ Քոչարյանն անպայման ասելու բան կունենա, այնուհանդերձ՝ առայժմ նա լուռ է և որևէ հայտարարություն չի արել, մինչդեռ ընտրության քարոզարշավի ավարտին մնացել է երեք օր, իսկ մայիսի 5-ը լռության օր է: Չի բացառվում, որ Քոչարյանը պարզապես ուզում է խոսել մայիսի 5-ին, երբ բոլորը լուռ կլինեն, ու իր ձայնն էլ ավելի հնչեղ կլինի, ինքը «միակը» կլինի, որ այդ օրը կխոսի, և բոլորը ստիպված կլինեն լսել միայն իրեն: Հնարավոր է, որ սա է Քոչարյանի հաշվարկը: Իհարկե, այդ օրը քարոզչությունը արգելված է, բայց հազիվ թե Քոչարյանը մտադիր է որևէ ուժի օգտին քարոզչություն անել: Դա թերևս շատ պրիմիտիվ կլիներ:
Ռոբերտ Քոչարյանն ամենայն հավանականությամբ կանի բազմանշանակ մի հայտարարություն, որում առաջին հայացքից չի լինի կոնկրետություն, որը չի ունենա կոնկրետ թիրախ, սակայն կպարունակի ենթատեքստեր, որոնք հիմք կտան քվեարկությունից անմիջապես առաջ շատերին անել տարբեր եզրահանգումներ և այդպիսով որոշակիորեն ինտրիգներ մտցնել գործընթացի մեջ:
Միևնույն ժամանակ, այն, որ Քոչարյանը ձեռնպահ է մնում հայտարարություններից, նույնպես զարմանալի չէ: Ի վերջո, ներկայումս գործընթացները գնում են նրան զգալիորեն ձեռնտու հունով: Հայ ազգային կոնգրեսը կուլ է տվել ԲՀԿ խայծը և փաստորեն աշխատում է այդ կուսակցության օգտին, որում էլ զգալիորեն ավելացել է Քոչարյանի դերակատարությունը՝ ի դեմս Վարդան Օսկանյանի գործողությունների: Կոնգրեսը կատարում է թե ԲՀԿ անուղղակի և ուղղակի քարոզչությունը, թե նաև հակաքարոզչություն է իրականացնում անուղղակի կամ ուղղակի կերպով բոլոր այն ուժերի դեմ, որոնք փորձում են տեսնել ԲՀԿ խաղի իրական խորքերը:
Դաշնակցությունը ևս առայժմ տեղավորվել է քոչարյանական պատկերացումների ծիրում, Սերժ Սարգսյանը մնացել է իսկապես մենակ, և այդ պարագայում Ռոբերտ Քոչարյանը թերևս խնդիր չունի աչքի ընկնել ավելորդ հայտարարություններով և առիթ տալ խոսակցությունների, թե ինքն է այս ամենի ետևում կանգնած: Եվ այդ իսկ պատճառով հնարավոր է, որ նա պարզապես վերանայել է հայտարարություններ անելու իր մտադրությունները: Ըստ ամենայնի, Քոչարյանը պարզապես հայտարարության միջոցով ծրագրում էր որոշակիորեն խառնել Սերժ Սարգսյանի խաղաքարտերը: Սակայն քանի որ ներկայումս երկրորդ նախագահին դա հաջողվում է անել, այսպես ասած, առանց ավելորդ խոսքերի, նա, բնականաբար, ձեռնպահ է մնում գործը խոսքով փչացնելու վտանգից և գերադասում է գործնականում հաստատել «մեր խոսքը գործ է» ԲՀԿ-ական կարգախոսը, պարզապես մի փոքր խմբագրմամբ՝ «իմ խոսքը ԲՀԿ-ի և Կոնգրեսի գործն է»: