«Ժառանգություն» կուսակցությունն ափսոսում է, որ Արաբկիր համայնքում ընտրվելու ոչ մի հնարավորություն չունեցող «168 ժամ» թերթի խմբագիր Սաթիկ Սեյրանյանը սեփական վարկանիշը բարձրացնելու ուղղությամբ աշխատելու փոխարեն հանդես է գալիս թիվ 4 ընտրատարածքում «Ժառանգություն» կուսակցության և նրա պատգամավորության թեկնածու Զարուհի Փոստանջյանի դեմ:
«Առաջին լրատվական»-ի հետ զրույցում այս մասին ասաց կուսակցության մամուլի քարտուղար Հովսեփ Խուրշուդյանը՝ մեկնաբանելով Սեյրանյանի այն խոսքերը, թե` «Ինչպես մի շարք տեղերում, այնպես էլ Արաբկիրում, «Ժառանգությունն» իր տեղերը տվել է ՀՀԿ-ին»:
«Պահանջում ենք, որ Սաթիկ Սեյրանյանը փաստեր ներկայացնի՝ որտե՞ղ ենք մենք մեր տեղերը տվել ՀՀԿ-ին: «Ժառանգությունն» արդեն իսկ նշել է, որ տեխնիկական վրիպակի արդյուքնում ՀՀ բոլոր ընտրատեղամասերի միայն 2 տոկոսը կազմող մի քանի ընտրատեղամասերի մեր տեղերը ԿԸՀ դատարկ են գնացել, ինչի արդյունքում Ընտրատարածքային ընտրական հանձնաժողովների նախագահները, օգտվելով օրենքով իրենց ընձեռված հնարավորություններից, նշանակել են այդ մի քանի հոգի ՀՀԿ-ականներին: Միաժամանակ, ասվածն Արաբկիրին չի վերաբերում: Համայնքի թիվ 4 և թիվ 5 ընտրատարածքներն ամբողջությամբ համալրված են «Ժառանգության» ամենաուժեղ ներկայացուցիչներով»,- նշեց Հովսեփ Խուրշուդյանը:
