«Ես գնում՝ նարդի եմ խաղում, բայց ոչ մի բանի վրա: Հենց էնպես խաղում եմ»,- այսպես է արձագանքել aravot.am-ի հարցին Մալաթիա-Սեբաստիա վարչական շրջանն ընդգրկող թիվ 8 ընտրատարածքում ՀՀԿ-ի կողմից առաջադրված պատգամավորության թեկնածու, հայտնի օլիգարխ Սամվել Ալեքսանյանը:
«Բանն այն է, որ վերջին շրջանում խոսակցություններ են շրջանառվում, որ Սամվել Ալեքսանյանը քարոզարշավային այցերի շրջանակներում բակերում նարդի է խաղում հավաքվածների հետ՝ պայմանով` եթե պարտվեց, ինքը 3 հազար ԱՍՆ դոլար է տալիս, եթե հաղթեց` այդ բակից իր օգտին 100 ձայն` մայիսի 6-ին»,- ապա թերթը հավելում է.
«Հետաքրքրվեցինք՝ ինչո՞ւ Ալեքսանյանն այլ օրերին էլ չի գնում բակեր ու հենց այնպես նարդի խաղում մարդկանց հետ:
«Միշտ էլ խաղացել եմ, դուք երևի տեղյակ չեք: Մարդկանց հարցրեք՝ կասեն: Էս 10 տարուց ավելի ես միշտ էլ գնում եմ, խաղում եմ…»,- եղավ պատասխանը»:
Ալեքսանյանը հերքել է նաև թերթի այն տեղեկությունը, որ «Վերջին զանգի» առիթով տարածքի ավարտական դասարանների աշակերտներին հրավիրում են իրեն պատկանող «Փարվանա» ռեստորանային համալիրում ավարտական քեֆն անցկացնելու:
