Ռուս զինվորականները չեն բացառում, որ ՆԱՏՕ-ն նոր որոշումներ կկայացնի եվրոպական հակահրթիռային պաշտպանության զարգացման վերաբերյալ մայիսի 20-21 Չիկագոյում կայանալիք գագաթնաժողովի ժամանակ:
Այս մասին հայտնել է ՌԴ պաշտպանության փոխնախարար Անատոլի Անտոնովը:
Անտոնովը «Ռոսիսկայա գազետա»-ին տված հարցազրույցի ժամանակ ասել է, որ Չիկագոյում կայանալիք ՆԱՏՕ-ի գագաթնաժողովի ժամանակ նախատեսվում է հայտարարել եվրոպական ՀՀՊ նախնական օպերատիվ պատրաստվածության ձեռքբերման մասին: Փոխնախարարի կարծիքով՝ հնարավոր է նաև, որ ընդունվեն նոր որոշումներ` ուղղված դաշինքի անդամ երկրների հակահրթիռային միջոցների ինետգրմանը:
Անտոնովը հիշեցրել է, որ եվրոպական ՀՀՊ տարրերի զարգացման երրորդ փուլը վտանգի տակ է դնում ռուսական ստրատեգիական միջուկային ուժերի արդյունավետությունը:
Ռուսատանը և ՆԱՏՕ-ն համաձայնել են համագործակցել եվրոպական ՀՀՊ շուրջ 2010թ. Լիսաբոնում կայացած գագաթնաժողովի ժամանակ: Սակայն բանակցությունները փակուղի են մտել այն բանից հետո, երբ ԱՄՆ-ը հրաժարվել էր իրավաբանական երաշխիքներ տրամադրել, որ զարգացող համակարգը չի կիրառվի ընդդեմ ռուսական ուժերի:
