Սաակաշվիլին 100 լարիանոց նվերներ կտա թոշակառուներին

Վրաստանի նախագահ Միխեիլ Սաակաշվիլին երեկ ուղիղ եթերով «Նախագահը պատասխանում է ժողովրդի հարցերին» ծրագրի ժամանակ խոստացել է, որ երկրի բոլոր թոշակառուները 100 լարիանոց փաթեթ կստանան` որպես օգնություն: «Մենք չենք մոռացել մեր խոստումների մասին: Բայց շեշտեմ, որ խոսքը 100 լարիանոց փաթեթի, ոչ թե 100 լարի թոշակի մասին է»,- ասել է նախագահը` հավելելով, որ դա կարվի մինչև 2012 թ. ընտրությունները: «Ցավոք, ցածր թոշակներին, որ չեն հասնում կենսապահովման նվազագույն զամբյուղին, գումարվում է նաև վատ ձևավորված ապահովագրական համակարգը, որը չի բավարարում բոլոր պահանջները: Դրա հաստատման համար մեզ ժամանակ է պետք, քանի որ ապահովագրական ժամանակակից համակարգի ձևավորման համար ապահովագրական պատմություն է անհրաժեշտ: Իմ կարծիքով, դրա համար 2-3 տարի դեռ պետք է»,- ասել է Սաակաշվիլին: Նա խոսել է նաև դեղորայքի բարձր գների մասին, որոնք տարածաշրջանի այլ երկրների գներից 2 անգամ բարձր են: «Նաև բարձր են ապահովագրության տոկոսները, ինչը անթույլատրելի է մեր երկրի համար»,- ասել է նախագահը` հավելելով, որ, այնուամենայնիվ, հաջողվել է դեղորայքի ոլորտում վերացնել մոնոպոլիաները: «Սակայն, այնուամենայնիվ, գները դեռ բարձր են, և դրա դեմ պետք է պայքարել»,- ասել է նա: Ըստ Սաակաշվիլիի` չի ձախողվել նաև Վրաստանում 100 հիվանդանոց ունենալու ծրագիրը, և մինչև 2014 թ. կբացվի 46 նոր հիվանդանոց: