«Առաջին լրատվականը» փորձագետ Գեղամ Բաղդասարյանից հետաքրքրվեց, թե ինչպես է գնահատում «Freedom House» և «Human Rights Watsch» կազմակերպությունների զեկույցները, որոնցում խիստ քննադատություն կա ուղղված Լեռնային Ղարաբաղի և Հայաստանի իշխանություններին: Հիշեցնենք, որ «Freedom House» կազմակերպությունը Լեռնային Ղարաբաղը համարել էր ոչ ազատ երկիր: Գեղամ Բաղդասարյանն ասաց, որ ԼՂ-ում իշխանական և իշխանամետ շրջանակները չեն ընդունում «Freedom House»-ի գնահատականները և հարց են բարձրացնում, թե զեկույցի հեղինակներն արդյոք եղել են ԼՂ-ում, ինչ չափանիշներով են տվել այդ գնահատականները: Գեղամ Բաղդասարյանի կարծիքով Լեռնային Ղարաբաղի ներկայիս վիճակն ավելի մոտ է «ոչ ազատ»-ին, քան` «ազատ»-ին: Սակայն նա երկուսն էլ համարում է ամոթալի: «Ես չեմ հասկանում, թե ինչն է խանգարում ԼՂ իշխանություններին, որպեսզի ԼՂ-ն դառնա ազատ երկիր`համաժողովրդական այսքան նվիրումից, ժողովրդի այսքան համբերատարությունից, համազգային նվիրումից ու աջակցումից հետո»,- ասաց Գեղամ Բաղդասարյանը: Փորձագետի համար անհասկանալի է մնում, թե ինչու են Լեռնային Ղարաբաղում բոլոր քաղաքական ուժերը հավաքվել մի տանիքի տակ, ինչու ժամանակին ՀՅԴ-ն և «Շարժում-88»-ը միացան իշխանությանը, որոնք անհարիր են ժողովրդավարությանը: «Եվ այսօր համազգային միասնականության անվան տակ ստեղծվել է մի մթնոլորտ, որը բացառում է բանավեճն ու մրցակցությունն ընդհանրապես»,- ասաց Գեղամ Բաղդասարյանը: Նրա կարծիքով` հենց այդ մթնոլորտն է երկիրը զրկում մրցունակ լինելու հեռանկարից: Նա կոռեկտ չհամարեց այն հարցը, թե ինչ պետք է անել, որ Արցախում ձևավորվի ընդդիմություն: Գեղամ Բաղդասարյանը տխուր է համարում, որ Լեռնային Ղարաբաղում որպես կազմակերպված ուժ, չկա ընդդիմություն: Իսկ որպեսզի ԼՂ-ում կանանա ընդդիմությունը, ըստ Գեղամ Բաղդասարյանի, պետք է պայմաններ ստեղծել երկրի զարգացման համար: Նա չարիք է համարում, որ իշխանություններն են փորձում ընդդիմություն ձևավորել, և նշեց, որ ԼՂ իշխանությունները զերծ են մնացել այդ գայթակղությունից: Նա կարծիք հայտնեց, որ այսօր պատերազմի վերսկսման համար չկան բարենպաստ պայմաններ, թեև վտանգը միշտ կա: