Ադրբեջանական Turan լրատվական գործակալության փոխանցմամբ՝ «Լրագրողներ առանց կազմակերպության» կազմակերպությունը հրապարակել է Մամուլի ազատության տարեկան ինդեքսը:
Վերջինս ձևավորվում է լրագրողների ու ԶԼՄ-ների հետապնդման փաստերի, երկրի օրենսդրության ու կառավարության քաղաքականության հիման վրա: Ինդեքսում ներառված է 179 երկիր: Ամենաազատ մամուլ ունեցող երկիր է ճանաչվել Ֆինլանդիան, իսկ հետնապահը Էրիթրեան է:
Ադրբեջանը 179 երկրների թվում զբաղեցրել է 162-րդ տեղը՝ նախորդ տարվա համեմատ նահանջելով միանգամից 10 հորիզոնականով: Նա անգամ հետ է մնացել Ուզբեկստանից, ով 157-րդն է: Այս տարի Ադրբեջանի իշխանություններն ուժեղացրել են ընդդիմադիր ժողովրդավարական շարժման նկատմամբ բռնությունները: Իլհամ Ալիևը Բելառուսի նախագահ Ալեքսանդր Լուկաշենկոյի նման վրեժ է լուծում մամուլից՝ իշխանություններին քննադատելու համար:
Բաքուն ու Մինսկն օգտվում են միևնույն մեթոդներից. նրանք լրագրողներին ու բլոգերներին ձերբակալում ու կալանավորում են, անկախ մամուլի վրա ճնշումներն ավելանում են, օտարազգի լրագրողներին սպառնում են արտաքսել երկրից: Բաքուն վերահսկողության տակ է առել սոցցանցերն ու ազատազրկել է բոլոր նրանց, ովքեր համացանցով բողոքի կոչեր են հնչեցրել:
Վրաստանը զբաղեցրել է 104-րդ տեղը, իսկ Հայաստանը՝ 77-րդ տեղը՝ դառնալով մամուլի ազատության մակարդակով Հարավային Կովկասի առաջատարը: Թուրքիան 148-րդն է, իսկ Ռուսաստանը՝ 142-րդը:
