Ամերիկյան հեռուստաակադեմիան երեքշաբթի օրը կհայտարարի աշխարհի ամենահայտնի կինոմրցանակի` «Օսկարի» հավակնորդների անունները:
Հանձնաժողովը կհայտատրի 10 լավագույն ֆիլմի, ինչպես նաև լավագույն պրոդյուսերների, տարբեր ժանրերում դերասանների և դերասանուհիների, օպերատորների և կինոյի արտադրության բնագավառի այլ մասնագետների անունները:
Մրցանակը տրվելու է 28 անվանակարգերում փակ, գաղտնի քվեարկությամբ:
Ֆիլմերի ցանկում դեռ բացառիկ առաջատար է համարվում Դեյվիդ Ֆինչերի «Սոցիալական ցանց» ֆիլմը, որը ստացել է «Ոսկե գլոբուսի» ամենաշատ մրցանակներն ու դարձել այդ մրցանակաբաշխության հերոս:
Կասկած չի հարուցում նաև այն հանգամանքը, որ լավագույն տասնյակի մեջ կլինի Թոմ Հուպերի «Խոսում է թագավորը», Դարեն Արոնոֆսկիի «Սև կարապը», Քրիսթոֆեր Նոլանի «Սկիզբը» ֆիլմերը: Շատ քննադատներ առաջատարների ցուցակում են տեսնում նաև «Խաղալիքների պատմությունը 3» մուլտֆիլմը:
Որոշ քննադատներ կարծում են, որ անցյալ տարի ընդգծված առաջատար չի եղել, և տասնյակի մեջ կհայտնվեն նույնանման ուժեղ ֆիլմեր:
Ինտերնետում անց են կացվում քվեարկություններ, որոնցում որոշվում են ոչ միայն ցուցակների մասնակիցները, այլև տարվա լավագույն դերասանները:
The Washington Post-ի ընթերցողների կարծիքով, տարվա լավագույն դերերը խաղացել են Քոլին Ֆերտը («Խոսում է թագավորը») և Նատալի Պորտմանը («Սև կարապ»), որոնք արդեն բազմաթիվ մրցանակներ են ստացել: Պորտմանին քիչ զիջում է Աննետ Բենինգը՝ «Երեխաների հետ ամեն ինչ կարգին է» ֆիլմում: