Իտալիայի կառավարությունը դիտարկում է վտանգավոր հանցագործների համար հայտնի Ալկատրաս բերդի ճարտարապետական ոճով երկու բանտերի բացման հնարավորությունը: Ըստ մտահղացման՝ դրանք պետք է կառուցվեն կղզիների վրա: Այս մասին գրում է The Daily Telegraph-ը: Գաղափարի հեղինակը Արդարադատության նախարար Պաոլա Սեվերինոն է: Նրա կարծիքով՝ նման երկու հաստատություն նախկինում գոյություն են ունեցել: Խոսքը Տոսկանայի ափերի մոտ գտնվող Պյանոզա կղզու, և Սարդինիայից ոչ հեռու գտնվող Ասինարա կղզու բանտերի մասին է:
Պյանոզայի բանտը կառուցվել է 19-րդ դարի կեսերին հատուկ քաղբանտարկյալների համար, սակայն ավելի ուշ այնտեղի կալանավորների մեծ մասը կազմել են մաֆիոզները: Իսկ Ասինարայում առաջին աշխարհամարտի տարիներին պահվում էին ռազմագերիները: 1990-ականներին այդ հաստատություները փակվեցին, իսկ կղզիները վերածվեցին ազգային զբոսայգիների:
Նախաձեռնությունը դուր չի եկել կղզիների բնակիչներին և բնապահպաններին: Կղզիները յուրօրինակ բուսականություն և հարուստ մշակութային ժառանգություն ունեն: Նրանց կարծիքով՝ այնտեղ ոչ թե բանտեր, այլ հյուրանոցներ պետք է կառուցվեն: Բնապահպաների խոսքով՝ կղզային բանտերը պետբյուջեի հետ իրենց ֆինանսական անհամատեղելիության մասին «բարձրաձայնել են» դեռևս մեկ տասնամյակ առաջ:
Իտալիայի բանտերը նախատեսված են 44 հազար կալանավորի համար, մինչդեռ նրանց թիվը ներկայում գերազանցում է 65 հազարը: