Եթե ամբողջ աշխարհում որակավորման նպատակն է աջակցել զբոսաշրջիկներին ընտրության հարցում, այս կերպ հյուրանոցային բիզնեսում ձևավորել առողջ մրցակցային մթնոլորտ, որի դեպքում գները ևս սահմանվում են ըստ աստղերի քանակի, մեր հյուրանոցների գները վկայում են, որ Հայաստանում աստղերը գնի հետ բոլորովին կապ չունեն:
Այսպես. եթե չորսաստղանի «Անի» հյուրանոցը 1 օրվա համար նախատեսում է 30-92000 դրամ, մոտավորապես նույն գինն է նախատեսում աստղեր չունեցող «Եվրոպա» հյուրանոցը: Շատ ավելի բարձր գին է նախատեսում դարձյալ աստղեր չունեցող «Արմենիա-Մարիոթ» հյուրանոցը` 92 հազար դրամից սկսած, մինչդեռ երեքաստղանիի կարգավիճակ ունեցող «Կոնգրես» հյուրանոցը իր լավագույն համարն առաջարկում է 62 հազար դրամով: Նույն կերպ, «Գոլդեն Թուլիփ» հյուրանոցը, չնայած դեռ որակավորում չի ստացել, ներկայանում է որպես հինգաստղանի և 1 օրվա համար պահանջում 110-136 հազար դրամ, մինչդեռ երեքաստղանի «Ռեժինեն» 1 օրվա համար պահանջում է 50-60000 դրամ, իսկ չորսաստղանի «Մետրոպոլ» հյուրանոցը` 47-94 հազար դրամ:
Ինչ վերաբերում է մեր հինգաստղանի հյուրանոցների գներին, դրանք, իհարկե, գրեթե անհասանելի հաճույք են: Օրինակ՝ «Գոլդեն փելես» հյուրանոցը իր ծառայությունները մատուցում է 54-800 հազար դրամի սահմաններում:
Ինչևէ, մեր հյուրանոցների գները բարձր մակարդակի են, և թվում է, թե նույնքան բարձր կլինի դրանց մատուցած ծառայությունների որակը, սակայն մի շարք տուրիստական գործակալություններ փաստում են, որ զբոսաշրջիկները հաճախ դժգոհում են բազում կարևոր մանրուքներից, որոնցից է քաղաքավարի վերաբերմունքը: «Իհարկե, մաքրության հետ կապված դեռ բողոքներ չենք ունեցել, սակայն հաճախակի դժգոհում են անձնակազմի մակարդակից, որը չի համապատասխանում անհրաժեշտ աստիճանին` ոչ կրթվածությամբ, ոչ էլ շնորհքով: Դե, իսկ գները անհամեմատ ավելի բարձր են մեզանում, քան աշխարհի մի շարք ավելի գրավիչ երկրներում»,- նշում է Հայաստանի զբոսավարների գիլդիայի տնօրեն Սվետլանա Սարգսյանը:
Իսկ «Բարի գալուստ» տուրիստական կազմակերպության տնօրենը «Առաջին լրատվական»-ի հետ զրույցում նշեց¸ որ Հայաստան հիմնականում այցելում են թոշակառուներ, որոնց մեծ մասը նախընտրում է ապրել ոչ թե շքեղ հինգաստղանի հյուրանոցներում, այլ հարմարավետ երեքաստղանի հյուրանոցներում, սակայն խնդիրն այն է, որ Հայաստանում երեքաստղանի հյուրանոցը չունի երեք աստղին համապատասխան գին: Դե, իսկ քանի որ գների առումով շուկայում ոչ մի նորմա չի գործում, միջին մակարդակի հյուրանոցների սեփականատերերն իրավասու են նշանակել ցանկացած գին: