Ի՞նչ ենք ուզում Թուրքիայից. սփյուռքի համար պարզ չէ։ Այսօր «Առաջին լրատվական»–ի հետ զրույցում նման հարցադրմամբ իր մտահոգությունը հայտնեց լիբանանահայ բանաստեղծ, հրապարակախոս Սաքո Արեյանը՝ խոսելով Հայոց ցեղասպանության վերաբերյալ Սփյուռքի գործիչների մտահոգությունների մասին։
Նա նշեց, որ մոտենում ենք Ցեղասպանության 100-ամյա տարելիցին, և բոլորը կարծում են, որ պետք է լինի աշխուժություն այս հարցի շուրջ, ուստի Բեյրութի հայ համայնքը մի քանի միջոցառումներ է կազմակերպելու: Խոսելով Ցեղասպանության վերաբերյալ Հայաստանի իշխանությունների քաղաքականության մասին՝ սփյուռքահայ մտավորականն ասաց, որ եթե թուրքն այսօր ընդունի ցեղասպանությունը, սփյուռքում ապրող հայերը մեծ հարված կստանան, քանի որ նրա համոզմամբ՝ դրան հաջորդող գործողություններ կլինեն, որոնց մենք պատրաստ չենք։
«Մենք պահանջների իմաստով չունենք ծրագիր, բոլոր երգերը երգված են, և մենք չգիտենք ինչ անել, որպես ազգ բարդ խնդրի առջև ենք կանգնել: Մենք պետք է մշակենք և համակարգենք մեր գործողությունները: Մենք ունենք պահանջներ Թուրքիայից, ուստի պետք է նստենք թուրքի հետ և ձևավորենք ծրագիր, պետք է մտածենք՝ ինչ անել վաղը»,- ասաց Սաքո Արեյանը՝ նշելով, որ յուրաքանչյուր ապրիլի 24-ին քայլարշավ են կազմակերպում, հուշագիր կազմում և այլն, սակայն այս քայլերն արդյունավետ չեն:
Ըստ նրա՝ Հայաստանում այսօր մոդայիկ է Ցեղասպանության թեման, Հայաստանի իշխանություններն այսօր շահարկում են այս հարցը․ «Ցեղասպանության լիիրավ տերը ոչ թե Հայաստանի իշխանություններն են, այլ արևմտահայ զանգվածները, և այդ զանգվածների անունից խոսող մենք այսօր չունենք: Մենք պետք է համակարգենք մեր անելիքը, որպեսզի չմնանք այդ լացողի, ողբացողի, տխրության մեջ խարխափողի հոգեբանության մեջ:
Մենք ի՞նչ ենք ուզում Թուրքիայից, կարո՞ղ ենք գնալ Արևմտյան Հայաստան՝ ապրելու։ Այս ամենն ինձ համար պարզ չէ: Ճիշտ է՝ մենք ցեղասպանված ենք, մենք անջատված ենք մեր հողերից, բայց մեր այսօրվա անելիքը չգիտենք, թե ինչ է։ Եթե մենք դրա պատասխանն ունենք, նաև պետք է իմանանք, որ մեզ համար ձեռնտու չէ Արևմուտքի խաղիկների համար ածուխ և կրակ ապահովելը: Այստեղ կարող եմ վերհիշել ֆրանսիական խաղերը: Ո՞վ է այսօր խոսում պարոն Սարկոզիի մասին»:
