«Հայաստանի կոմունիստական կուսակցությունը ունի շանսեր՝ խորհրդարանական կուսակցություն դառնալու, և մենք պայքարում ենք դրա համար»,- լրագրողների հետ հանդիպմանը ասաց Կոմկուսի առաջնորդ Ռուբեն Թովմասյանը: Նա նշեց՝ ով պայքարում է, նա հաղթում է, և այս կուսակցության ձայնը լսվելու է ԱԺ-ում: Կոմկուսը ոչ թե 5 տոկոսի, այլ 15 տոկոսի հույս ունի:
Ըստ բանախոսի՝ որոշ սոցիոլոգիական հարցումների համաձայն՝ Կոմկուսն ունի խորհրդարան անցնելու 12 տոկոսի հնարավորություն: «Ամեն դեպքում, ես չեմ հավատում այս հարցումներին, քանի որ ով վճարում է՝ նա էլ լսում է երաժշտությունը»,- ասաց Կոմկուսի առաջնորդը:
Թովմասյանը կարծում է, որ հիմա գյուղացու վիճակը շատ ծանր է, և նա կառչած է իր հողին: Ըստ նրա՝ դրանով է պայմանավորված այն հանգամանքը, որ քարոզարշավին երբեմն քիչ թվով մարդիկ են հավաքվում:
«Կարևորն այն է, որ այդ սակավաթիվ մարդիկ իրենց հետ տանում են ճշմարտությունը՝ ի տարբերություն կուսակցությունների, որոնք հանրահավաքի ժամանակ իրենց հետ 2 ավտոբուս մարդ են տանում: Ճիշտ չէ, որ այսօր հանրահավաքներ անողները իրենց վեր են դասում ժողովրդից»:
Բանախոսը փաստեց, որ ժողովուրդն այսօր դարձել է միայն ընտրող, իսկ պատգամավորն իր ընտրողի հետ անում է այն, ինչ ցանկանում է:
Թովմասյանը անդրադարձավ նաև ռուսերեն լեզվով կրթության հարցին: «Իհարկե, պետք է ամեն ինչ անել, որ հայոց լեզվի մակարդակը դպրոցներում բարձրացվի, բայց միաժամանակ պետք չէ արգելել ռուսերենի դասավանդումը:
Մենք պաշտպանելու ենք նաև մեր բանակը, որպեսզի այն լինի ավելի ուժեղ ու մարտունակ»,- ասաց Ռ. Թովմասյանը:
Նա նշեց, որ Վայքի Արենի գյուղում ապրիլի 22-ին նշվել է Վլադիմիր Իլյիչ Լենինի ծննդյան օրը, որովհետև այնտեղ է գտնվում Լենինի արձանը:
